امریکی  صدر  ڈونلد ٹرمپ نے کہا ہے کہ طالبان معاہدے کیلئے سنجیدہ ہیں، لڑائی سے تھک چکے ہیں۔

 تفصیلات کے مطابق امریکی صدر ڈونلد  ٹرمپ نے اپنے ایک بیان میں طالبان کیساتھ امن معاہدے پر دستخط کرنے کا اعلان کرتے ہوئے کہا کہ طالبان کیساتھ امن معاہدے پر دستخط کرونگا۔

اپنے بیان میں امریکی  صدر  نے کہا کہ ہم  دیکھنا چاہتے ہیں ایک ہفتے میں معاملات کہاں تک پہنچتے ہیں، ایک ہفتے سے پہلے ہی معاملات طے ہوجائیں تو اچھا ہے۔

امریکی صدرنے یہ بھی کہاکہ  طالبان معاہدے کیلئے سنجیدہ ہیں، ہمارے فوجی گھر واپس آنا چاہتے ہیں  اور اب لڑائی سے تھک چکے ہیں۔

امریکی  صدر  ڈونلد  ٹرمپ نے مزید کہا کہ ا فغان امن معاہدے پر 29 فروری کو دوحہ میں دستخط ہوں گے۔

پاکستان کا امریکا، افغان طالبان امن معاہدے کے اعلان کا خیرمقدم

دوسری جانب وزیرخارجہ مخدوم شاہ محمودقریشی نے بھی  ملتان میں میڈیا سے بات چیت کرتے ہوئے کہا کہ ہم نے امریکہ سے کہا ہے کہ ہمیں ایسی قوتوں پر نظررکھنا ہوگی جو مذاکرات میں رخنہ ڈالنا چاہتی ہیں تاکہ بات منطقی انجام تک نہ پہنچے۔

 وزیرخارجہ  کا کہنا تھا کہ ہم نے ڈیڑھ سال خاموشی سے ایسا ماحول بنانے کی کوشش کرتے رہے کہ فریقین کے درمیان بات چیت کاآغاز ہوسکے۔

شاہ محمودقریشی کا یہ بھی کہنا تھا کہ ہم نے طالبان کو قائل کیا اور دنیا کو بتایا کہ افغان تنازعے کا کوئی فوجی حل نہیں ہے جبکہ ہم نے امریکی صدر ڈونلڈ ٹرمپ کو بھی قائل کیا جس کے بعد انہوں نے طالبان کے ساتھ مذاکرات کے لیے زلمے خلیل زاد کو اپنا نمائندہ مقرر کیا۔

وزیرخارجہ نے کہا تھاکہ تنازعے کے سیاسی حل کے لیے دونوں اطراف سے مذاکرات کا آغازہوا،ہم نے دنیا کو بتایا کہ افغانستان میں 19سال سے جو جنگ جاری ہے لیکن ا ب  پاکستان کویقین ہے کہ امریکہ اورطالبان میں امن معاہدے کے بعد ترقی کے ایک نئے دور کا آغازہوگا۔

شاہ محمودقریشی  نے یہ بھی کہا تھا کہ 29 فروری کو دوحہ میں تاریخی معاہدے پر دستخط ہونے جارہے ہیں،پاکستان نے امن کے اس عمل میں سہولت کار کا کردار ادا کیا ہے۔

خیال رہے کہ گزشتہ سال 8 ستمبر کو امریکی صدر ڈونلڈ ٹرمپ نے طالبان کی جانب سے کابل حملے کی ذمہ داری قبول کرنے کے بعد امن مذاکرات منسوخ کر دیے تھے۔ جس کے دوبارہ ماحول سازگار بنایا گیا۔