امیر جماعت اسلامی کراچی حافظ نعیم الرحمن نے کہا ہے کہ کراچی ملک کا دارالحکومت رہ چکا ہے جبکہ یہ وہ شہر ہے جو پورے ملک کو چلاتا ہے۔

تفصیلات کے مطابق کراچی میں امیر جماعت اسلامی کراچی حافظ نعیم الرحمٰن نے شاہراہ قائدین پر حقوق کراچی مارچ کے انتظامات کا جائزہ لیا اور میڈیا سے گفتگو ہوئے کہا کہ شہر کراچی جس مسائل سے دوچار ہے، تاجر اور صنعتکاروں نے سامنے رکھ دئے ہیں۔

امیر جماعت اسلامی کراچی نے کہا کہ کراچی کی معیشت کا پہیہ جام کیا گیا جبکہ کراچی کی نمائندگی وہ کرتے رہے جو اس کی آبادی کو کم کرتے رہے۔

حافظ نعیم الرحمن نے یہ بھی کہا کہ کراچی منی پاکستان ہے لیکن پھر بھی کراچی کو پانی سے، گیس سے محروم کیا جبکہ سب نے مل کر اس شہر کو برباد کیا ہے۔

اپنے بیان میں امیر جماعت اسلامی کراچی حافظ نعیم الرحمن کا کہنا تھا کہ جماعت اسلامی نے جب کراچی کی قیادت کی ہے تو کراچی میں ترقی ہوئی ہے۔

حافظ نعیم الرحمن کا یہ بھی کہنا تھا کہ جماعت اسلامی حقوقِ مارچ کی تحریک اس لیے چلا رہی ہے کیونکہ جماعت اسلامی کراچی کے ساتھ قلب و روح کا رشتہ رکھتی ہے اس لئے یہ تماشا نہیں دیکھتی رہے گی۔

امیر جماعت اسلامی کراچی حافظ نعیم الرحمن کا مزید کہنا تھا کہ15،16 اور 17 اکتوبر کو عوامی ریفرنڈم کیا جائے گا، عوامی ریفرنڈم ہر گلی، چوراہے، تعلیمی اداروں میں کیا جائے گا اور عوامی ریفرنڈم دانشور، علما اور سابق ججز کے پینل پر مشتمل ہوگا۔