وزیراعظم عمران خان نے کہا ہے کہ پاک چین تعلقات میں ایک نئے باب کا اضافہ ہوگا۔

تفصیلات کے مطابق وزیراعظم عمران خان کی زیر صدارت سی پیک کے تحت ایم ایل ون منصوبہ کا جائزہ اجلاس ہوا جس میں وزیراعظم نے سی پیک ایم ایل ون منصوبے کو پاک-چین دوستی کی ایک شاندار مثال قرار دیا۔

وزیر اعظم کو ایم ایل ون منصوبے کے بارے اور موجودہ پیشرفت پر تفصیلی بریفنگ جس پر وزیر اعظم نے منصوبہ پر اب تک کی پیشرفت پر اطمینان کا اظہار کیا۔

اجلاس میں وفاقی وزیرِ ریلوے نے وزیرِ اعظم کو پاکستان ریلوے کی طرف سے ایم ایل ون منصوبہ کے انٹیگریشن پلان کے حوالے سے آگاہ کیا۔

وزیراعظم عمران خان نے کہا کہ سی پیک منصوبوں میں ایم ایل ون سب سے خطیر لاگت کا منصوبہ ہے۔

عمران خان نے یہ بھی کہا کہ ایم ایل ون منصوبہ ملکی صنعت کی ترقی اور روزگار کے مواقع پیدا کرے گا جبکہ اس منصوبے سے پاکستان میں بین الاقوامی معیار کا جدید کمیونیکیشن انفراسٹرکچر قائم ہوگا۔

وزیراعظم عمران خان نے مزید کہا کہ اس منصوبے سے پاکستانی بندرگاہوں کے زمینی رابطے مربوط ہونے سے پاکستان کی برآمدات بروقت عالمی منڈیوں میں پہنچ سکیں گی جبکہ ملک کو قیمتی زرمبادلہ حاصل ہوگا۔

اجلاس میں وزیر ریلوے اعظم خان سواتی، ڈپٹی چیرمین منصوبہ بندی کمیشن،  چیرمین سی پیک اتھارٹی لیفٹیننٹ جنرل (ر) عاصم سلیم باجوہ ، سیکریٹری ریلوے، اقتصادی امور، خزانہ، منصوبہ بندی ڈیویژن اور سینئر افسران شریک ہوئے۔