وزیرخارجہ مخدوم شاہ محمود قریشی نے کہا ہے کہ پاکستان افغانستان کے ساتھ کثیر الجہتی شعبہ جات میں دو طرفہ تعاون بڑھانے کیلئے پرعزم ہے۔

تفصیلات کے مطابق وزیرخارجہ مخدوم شاہ محمود قریشی نے استنبول میں افغان وزیر خارجہ محمد حنیف آتمر کیساتھ ویڈیو لنک کے ذریعے ملاقات کی جس میں دو طرفہ تعلقات ،افغان امن عمل ،امریکہ اور نیٹو  کا افغان سر زمین سے انخلاء کے اعلان کے بعد کی صورتحال پر تبادلہ خیال کیا گیا۔

اس موقع پر دونوں وزرائے خارجہ نے افغانستان کی صورتحال کے حوالے سے “سہ رکنی اجلاس” کے انعقاد پر ترکی کے کردار کو سراہا۔

دوران ملاقات وزیرخارجہ مخدوم شاہ محمود قریشی نے افغان ہم منصب محمد حنیف آتمر کی خیریت دریافت کی۔

وزیرخارجہ نے کہا کہ ہمارے بہت سے مفادات اور چیلنجز مشترک ہیں، افغانستان نہ صرف پاکستان کا ہمسایہ ملک ہے بلکہ ہم یکساں مذہبی، تہذیبی اور تاریخی اقدار سے جڑے ہوئے ہیں۔

شاہ محمود قریشی نے یہ بھی کہا کہ افغانستان میں امن کے قیام سے خطے میں اقتصادی سرگرمیوں اور روابط کو فروغ ملے گا۔

وزیرخارجہ کا کہنا تھا کہ افغانستان میں چار دہائیوں سے جاری کشمکش کے خاتمے اور افعان امن عمل کو کامیابی سے ہمکنار کرنے کیلئے، تمام فریقین کو جامع اور سنجیدہ  اور نتیجہ خیز مذاکرات کا راستہ اپنانا ہوگا۔

شاہ محمود قریشی کا یہ بھی کہنا تھا کہ مجھے توقع ہے کہ جب دوبارہ استنبول کانفرنس بلائی جائیگی تو تمام فریقین اس میں شرکت کریں گے۔

وزیرخارجہ مخدوم شاہ محمود قریشی نے اپنے افغان ہم منصب کو دورہ پاکستان کی دعوت دی جسے انہوں نے شکریہ کے ساتھ قبول کیا۔