پیپلزپارٹی کے رہنما فیصل کریم کنڈی نے کہا ہے کہ این اے 249 میں دھاندلی کے کسی ثبوت کے بغیر الیکشن کمیشن کا دوبارہ گنتی کا فیصلہ حیران کن ہے۔

تفصیلات کے مطابق پیپلزپارٹی کے رہنما فیصل کریم کنڈی نے کہا کہ پاکستان پیپلزپارٹی کی جانب سے این اے 249 میں دوبارہ گنتی سے متعلق  فیصلے کے خیر مقدم ہیں۔

 فیصل کریم کا کہنا تھا کہ امید ہے دوبارہ گنتی میں تیر کی جیت کی صورت میں دل بڑا کر کے پی پی پی کو لیڈرشپ کی مبارکباد دی جائے گی۔

فیصل کریم کنڈی نے کہا کہ کراچی کے ضمنی انتخاب میں شکست کے بعد فوج کو مداخلت کی دعوت دینے کا مطالبہ افسوس ناک تھا۔

انہوں نے سوال کرتے ہوئے کہا کہ اگر این اے 249 میں دھاندلی ہوئی ہے تو پولنگ کے عمل کے دوران الیکشن کمیشن کو شکایت کیوں نہیں کی گئی؟

فیصل کریم کنڈی کا کہنا تھا کہ یہ کیسی دھاندلی ہے جو اس وقت سامنے آئی جب این اے 249 میں ایک دوسری جماعت کی شکست واضح ہونے لگی ؟

انہوں نے یہ بھی کہا کہ دھاندلی کے ثبوتوں کے بغیر این اے 249 میں اگر دوبارہ گنتی ہو سکتی ہے تو پھر ہر انتخاب میں اس مثال کو بنیاد بنایا جائے گا۔

پیپلزپارٹی کے رہنما فیصل کریم کنڈی نے مزید کہا کہ پاکستان پیپلزپارٹی کے امیدواروں کی ڈھائی سال سے دوبارہ گنتی کے لئے درخواستیں زیر التواء ہیں، امید ہے کہ الیکشن کمیشن ان پر بھی غور کرے گی۔