ایم کیو ایم بحالی کمیٹی و سابق ممبر قومی اسمبلی وسیم حسین نے کہا ہے کہ ایم کیو ایم بحالی کمیٹی متاثرین گلستان سرمست کے ساتھ ہے۔

تفصیلات کے مطابق حیدرآباد میں ایم کیو ایم بحالی کمیٹی و سابق ممبر قومی اسمبلی وسیم حسین نے پریس کانفرنس  کرتے ہوئے کہا کہ  ڈولپمنٹ اتھارٹی نے 37ہزار الاٹیز کے 9ارب کی مبینہ خرد برد کی ہے۔

سابق ممبر قومی اسمبلی کا کہنا تھا کہ 2009میں شروع ہونے والی سرکاری رہائشی اسکیم کرپشن کی نذر ہوچکی ہے۔

ان کا کہنا تھا کہ ڈولپمنٹ اتھارٹی کے ڈائریکٹر جنرل اور افسران کرپشن اور لوٹ مار میں مصروف ہیں ، نیب ، اینٹی کرپشن ، سندھ حکومت شہریوں کے ساتھ اتنے بڑے فراڈ اور کرپشن پر کیوں چپ ہیں۔

وسیم حسین کا کہنا تھا کہ 2009میں شروع ہونےوالے اسکیم میں بنیادی سہولیات گیس ، بجلی ، پانی کا کوئی وجود نہیں ہے ۔

ایم کیو ایم کے سینئر رہنما کا کہنا تھا کہ سرمست میں اسٹیج فور کا اعلان کرکے دو ارب روپے نئے الاٹیز سے وصول کرکے نیا فراڈ کیا گیا ، اسٹیج فور کے الاٹیز دوسال سے چکر لگا رہے ہیں ۔

پریس کانفرنس میں ان کا یہ بھی کہنا تھا کہ الاٹیز کے پاس سرمست کے پلاٹ اربوں روپے میں فروخت ہوئے مگر فائلوں کی حیثیت صرف کاغذ سے زیادہ نہیں ۔

اپنے بیان میں سابق ممبر قومی اسمبلی وسیم حسین نے  چیف جسٹس پاکستان سے مطالبہ کیا ہے کہ  کہ الاٹیز کے ساتھ 11سال سے ہونے والے فراڈ کا نوٹس لیں ۔