وزیر اعلیٰ گلگت بلتستان خالد خورشید نے کہا کہ تاجدار مدینہ ﷺ کی تعلیمات کی روشنی پر عمل کیا جائے تو معاشرہ جنت کا نمونہ بن جائے گا۔

تفصیلات کے مطابق وزیر اعلیٰ گلگت بلتستان خالد خورشید نے 12 ربیع الاول کے حوالے سے خصوصی پیغام جاری کرتے ہوئے کہا کہ اخوت اور امن و خیر سگالی کی فضا قائم کرنے کیلئے اسوہ رسول ﷺ کی پیروی ضروری ہے، تاجدار مدینہ ﷺ کی تعلیمات کی روشنی پر عمل کیا جائے تو معاشرہ جنت کا نمونہ بن جائے گا۔

وزیر اعلیٰ گلگت بلتستان کا کہنا تھا کہ وزیر اعظم پاکستان عمران خان کی جانب سے رحمت العالمین ﷺ اتھارٹی کا قیام احسن اقدام ہے، پہلی مرتبہ ملک بھر میں ربیع الاول کا مہینہ انتہائی عقیدت اور احترام کے ساتھ منایا جارہا ہے، آج کا مقدس دن ہمارے لئے تذکیر و تجدید عہد کا دن ہے۔

انہوں نے کہا کہ آپ ﷺ کی آفاقی تعلیمات کاخلاصہ یہ ہے کہ ہر معاملے میں میانہ روی اختیار کی جائے، آپ ﷺ کی تعلیمات دکھی انسانیت کے لئے خوشیوں کی نوید ہیں، اس بابرکت موقع پر مسلمانانِ عالم و اہل وطن کو مبارکباد پیش کرتے ہیں۔

خالد خورشید کا کہنا تھا کہ آج اخوت اور امن و خیر سگالی کی فضاء قائم کرنے کے لئے اسوہ رسول ﷺ کی پیروی ضروری ہے، ہماری بقاء اور دینی و دنیاوی کامیابی اسی اسوہ حسنہ کی مکمل پیروی پر منحصر ہے۔

وزیر اعلیٰ گلگت بلتستان خالد خورشید نے کہا کہ حضرت محمد ﷺ کا کردار اور تعلیمات پوری زندگی کا احاطہ کرتی ہیں، نبی پاک ﷺ نے اپنے اسوہ حسنہ کی بدولت مختصر مدت میں پوری دنیا کو مثالی سماجی اور معاشی نظام دیا، آج کا دن تاریخ بنی نوع انسان کی عظمت کی معراج کا دن ہے۔