معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے کہا ہے کہ غیر جمہوری جماعتیں شفاف الیکشن سے ڈرتی ہیں۔

حسان خاور نے لاہور میں پریس کانفرنس کرتے ہوئے کہا کہ شاہد خاقان عباسی نے الیکشن کمیشن کی رپورٹ پر حکومت پر تنقید کی، پہلے دن سے پی ٹی آئی حکومت نے انتخابی اصلاحات کی بات کی ہے، آج قانون کی بالادستی پر یقین رکھنے والی حکومت کو رپورٹ کا حوالہ دیا جا رہا ہے۔

انہوں نے کہا کہ الیکٹرانک مشین پر تو مسلم لیگ ن بات نہیں کرنا چاہتی، رپورٹ سے متعلق پنجاب حکومت کو جو سفارشات آئیں گی اس پر عمل ہو گا، غیر جمہوری جماعتیں شفاف الیکشن سے ڈرتی ہیں۔

حسان خاور کا کہنا تھا کہ اپوزیشن پارلیمنٹ میں بیٹھنا نہیں چاہتی، جب سب کچھ سڑک پر کرنا ہے تو اپوزیشن استعفے دے اور گھر جائے، اس وقت مہنگائی عالمی سطح پر ہے، حکومت کا ریلیف پیکج لوگوں کے لیے آسانیاں پیدا کر رہا ہے، اپوزیشن کو عوامی مفاد پر سیاست کرنی چاہیے۔

ترجمان حکومت پنجاب نے کہا کہ 70 سال بعد ایسی حکومت آئی جس نے برآمدات میں اضافہ کیا، اس وقت زر مبادلہ ریکارڑ پر ہیں، سندھ حکومت نے ابھی تک کرشنگ کا آغاز نہیں کیا، مسلم لیگ ن اس معاملے پر مجرمانہ خاموشی رکھے ہوئے ہے، احتجاج، لانگ مارچ اور جلسے کرنا ہر کسی کا حق ہے، لانگ مارچ کر کے دیکھ لیں پتہ چل جائے گا کتنے لوگ آتے ہیں۔

معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور کا مزید کہنا تھا کہ شوگر ملوں نے ذخیرہ اندوزی کی ہے، عدالتی حکم امتناعی کے باعث حکومت کارروائی نہیں کر پا رہی۔