جہلم میں پاکستان آرمی رائفل ایسوسی ایشن کے مقابلے جاری ہیں، اب تک پاک آرمی نے تین مقابلے جیت لئے ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق مقابلے 24نومبر سے شروع ہوئے اور 30نومبر تک جاری رہیں گے جبکہ مقابلوں کی احتتامی تقریب دو دسمبر کو ہو گی۔

رائفل شوٹنگ مقابلے کے تحت انٹرا آرمی کیٹگری مقابلوں میں ملتان کور نے پہلی اور منگلا کور کی دوسری پوزیشن آئی ہے۔

اسی طرح سول کیٹیگری میں پنجاب رینجرز نے پہلی، گلگت بلتستان سکاٹس کی دوسری پوزیشن آئی ہے۔

انٹر سروسز مقابلوں میں پاک آرمی نے 3مقابلے جیت لیے ہیں، مقابلوں میں مجموعی طور پر 2500رائفلرز حصہ لے رہے ہیں۔

واضح رہے کہ پاکستان آرمی رائفل ایسوسی ایشن کے 41 ویں مرکزی مقابلےجہلم میں جاری ہیں۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق جہلم میں جاری پاکستان آرمی رائفل ایسوسی ایشن کے 41 ویں مرکزی مقابلوں میں آرمی،نیوی، ایئرفورس، سول آرمڈ فورسز،رینجرز اور اےایس ایف کے 2500 شرکا شامل ہیں۔.

اس کے علاوہ عام شہری بھی اس میگاشوٹنگ مقابلےمیں حصہ لےرہےہیں۔

ترجمان پاک فوج کے مطابق مقابلے مختلف رینجز اور ہتھیاروں کی اقسام پر مشتمل متعدد ایونٹس پر مشتمل ہیں، پاکستان آرمی اس مقابلےکی دفاعی چیمپئن ہے۔