نور الحق قادری نے کہا ہے کہ مدینہ منورہ میں نئے پاکستان ہاؤس کی تعمیر کی کوششیں تیز کی جائیں۔

 وفاقی وزیر مذہبی امور پیر نور الحق قادری سے سعودی عرب اور شام کیلئے نامزد پاکستانی سفیروں نے ملاقات کی جس میں حج ، عمرہ اور زیارات  کے حوالے سے تفصیلی بات چیت کی گئی۔

 ملاقات میں پاکستانی عمرہ  زائرین کو سہولیات کی فراہمی ، آئندہ حج انتظامات، حج کوٹہ اور کورونا ایس او پیز کے حوالے سے بھی بات چیت کی گئی۔

اس کے علاوہ خرم امین راٹھور سعودی عرب  جبکہ سعید محمد خان شام کیلئے پاکستانی سفیر نامزد ہوئے ہیں۔

یہ بھی پڑھیں: ہم تاج محل بنانے میں رہے جبکہ دنیا میں یونیورسٹیاں بن رہی تھیں ، نور الحق قادری

وفاقی وزیر مذہبی امور پیر نور الحق قادری نے نامزد پاکستانی سفیر کو عمرہ زائرین کیلئے قرنطینہ کی شرائط نرم کروانے کے حوالے سے ہدایات دیں۔

دوسری جانب مملکتِ شام کیلئے نامزد پاکستانی سفیر سعید محمد خان نے وزیر برائے مذہبی امور پیر نور الحق قادری اور سیکریٹری مذہبی امور سے ملاقات کی۔

دورانِ ملاقات پیر نورالحق قادری نے کہا کہ پی آئی اے کے ساتھ شام کیلئے ہفتہ وار دو پروازیں چلانے پر بات چیت کی جائے۔

وفاقی وزیر برائے مذہبی امور نے کہا کہ نئی زیارت پالیسی کے حوالے سے شام کے ساتھ ایم او یو پر کام تیز تر کیا جائے اور پاکستانی زائرین کیلئے ملک شام میں بہتر سہولیات کی فراہمی کو یقینی بنائی جائے۔

نور الحق قادری نے کہا کہ زائرین کی سہولیت کیلئے پی آئی اے اور شامی فضائی کمپنی شام ونگ کے مابین کوڈ شیئرنگ کا بندوبست کیا جائے، کوڈ شیئرنگ کے بعد زائرین ایک ہی سفر میں نجف اور دمشق  میں حاضری دے سکیں گے۔

انہوں نے مزید کہا کہ شام کے پاکستانی سفارتخانے میں قائم زیارت ڈیسک کو مزید فعال کیا جائے، ساتھ ہی پاکستانی طلباء کا شامی اسلامک اسکول “مجمع ابو النور” اور “معھد الفتح “میں داخلوں کا بندوبست کیا جائے۔