مسلم لیگ (ن) پنجاب کے صدر رانا ثناء اللہ کا کہنا ہے کہ ن لیگ نااہل اور نالائق ٹولے سے ملک کی جان چھڑوانا چاہتی ہے۔

فیصل آاباد میں میڈیا سے گفتگو کے دوران رانا ثنا اللہ نے کہا کہ ہم کسی غیر آئنی سازش یا اقدام کا حصہ نہیں بنیں گے، آئین کے مطابق اس نااہل ٹولے کا خاتمہ کریں گے، ہم آئین کے مطابق ہی الیکشن لڑیں گے۔

رانا ثنا اللہ نے کہا کہ بابا رحمتیں عبرت کا نشان بنا ہوا ہے اب اس کے ساتھ کوئی ہاتھ ملانا گوارا نہیں کرتا۔

صدر ن لیگ پنجاب کا کہنا تھا کہ حکومت کے پاس ہمیں گرفتار کرنے کے علاوہ کوئی کام نہیں ہے، اس لئے شہباز شریف کو گرفتار کرنے کی باتیں ہورہی ہیں، میں زرداری کو اور پیپلز پارٹی کو پنجاب میں الیکشن کی دعوت دیتا ہوں، الیکشن لڑیں پتا چل جائے گا پیپلزپارٹی کتنے ووٹ لیتی ہے۔

ان کا مزید کہنا تھا کہ میاں نواز شریف ہمیں 24 گھنٹے میسر ہوں گے، مناسب وقت میں میاں صاحب ملک میں واپس آجائیں گئے۔

رانا ثنا اللہ نے کہا کہ جنرل الیکشن وقت پر ہی ہوں گے، ای وی ایم کسی پولنگ اسٹیشن پر نہیں استعمال ہوگی، جہاں ای وی ایم ہو گی ہم پہلے ای وی ایم کا علاج کریں گے پھر پولنگ کا عمل ہوگا۔

انہوں نے کہا کہ پارٹی کا ٹکٹ پارلیمانی بورڈ ہی طے کرے گا کوئی ایرا غیرا نہیں کرے گا۔

ان کا مزید کہنا تھا کہ دعوے کرنے والے بس دعوے ہی کرتے رہ جائیں گئے، بلدیاتی الیکشن حکومت ٹائم پر نہیں کرانا چاہتی اس لئے تو ای وی ایم سے کرانے کا کہہ رہی ہے، ای وی ایم اگلے 20 سال تک ممکن نہیں ہے۔

رانا ثنا اللہ نے کہا کہ 3 حکومتی افراد کا ٹولہ 11 بجے جھوٹ بولنا شروع ہوتا ہے سارا دن بولتا رہتا ہے، اس ٹولے کا کام ہی عوام کو گمراہ کرنا ہے۔