ٹھٹھہ میں لاپتہ ماہی گیروں کی تلاش کے لیے آپریشن آج پانچویں روز بھی جاری ہے۔

تفصیلات کے مطابق کیٹی بندر کے سمندر میں سے 9 افراد میں سے 3 کی لاشیں نکال لی گئی ہیں جبکہ باقی 6 لاپتہ افراد کی تلاش کیلئے آج پانچویں دن پاک نیوی نے سرچ آپریشن شروع کردیا ہے۔

پاک نیوی کے جوان اور ماہر غوطہ خور سرچ آپریشن میں مصروف عمل ہیں جبکہ  سرچ آپریشن حجامرو،چھان اور ترشیئن کریکس میں جاری ہے۔

سرچ آپریشن میں پانچ واٹر کرافٹ، 9 ہیلی کاپٹر اور اور جدید آلات استعمال کیے جا رہے ہیں۔

آپریشن میں پاک نیوی کے علاوہ ایدھی کے رضاکار بھی کشتیاں لیکر آئے ہیں اور  آپریشن میں مصروف عمل ہیں۔

 یاد رہے کہ پانچ دن کے سرچ آپریشن کے دوران 9 لاشیں نکالی گئی ہیں۔

7 روز کے لیے مچھلی کے شکار پر پابندی عائد

کیٹی بندر میں کشتی الٹنے کے واقعے پر 7 روز کے لئے مچھلی کے شکار پر پابندی عائد کردی گئی ہے۔

 کمشنر حیدرآباد محمد عباس کا کہنا ہے کہ حیدرآباد ڈویزن کے ساحلی اضلاع ٹھٹھہ، سجاول بدین میں کھلے سمندر اور دیگر گہرے پانی کی نہروں میں مچھلی کے شکار پر 7 روز کے لئے 144 نافذ کردی گئی ہے۔

کمشنر حیدرآباد  کا کہنا تھا کہ موسم کی تبدیلی اور تیزہواؤں کے باعث  ساحلی علاقوں میں مچھلی کے شکار پر پابندی عائد کی گئی ہے۔

انہوں نے مزید کہا کہ متعلقہ ایس ایچ اوز کو ہدایات جاری کر دی گئی ہیں  جبکہ خلاف ورزی کرنے والوں کے خلاف قانونی کارروائی کی جائے گی۔

واضح رہے کہ یہ افسوسناک واقعہ آج سے 5 روز قبل پیش آیا تھا جب کیٹی بندر کے قریب  کھلے سمندر حجامرو کریک میں ماہی گیروں کی کشتی تیزہواؤں کے باعث  الٹ گئی تھی،  کشتی میں  16 ماہی گیر سوار تھے 5 ماہی گیر اپنی مدد اپ کے تحت تیر کےکنارے پر پہنچ گئے جبکہ 6 ماہی گیر تاحال لاپتہ ہیں، جن کی تلاش جاری ہے۔