وزیر مذہبی امور پیر نور الحق قادری نے کہا ہے کہ ہم اقلیتوں کیلئے اپنے مذہب اور آئین  میں متعین کردہ حقوق کی فراہمی کو جاری رکھیں گے۔

وزیر مذہبی امور پیر نور الحق قادری سے 48 ویں  وزراء خارجہ  اسلامی تعاون تنظیم کانفرنس کے وفود الریکا سینڈ برگ، سفیر تنظیم برائے اسلامی تعاون ، بین الثقافتی وبین المذاہب مکالمہ ، سویڈش سفیر ہنرک پرسن کی ان کے دفتر میں ملاقات ہوئی۔

الریکا سینڈبرگ نے کہا کہ سویڈن حکومت ِ پاکستان کی مذہبی آزادیوں  کے حوالے سے پالیسی کو سراہتا ہے۔

سفیر برائے خصوصی ایلچی کا کہنا تھا کہ اقلیتوں کے حقوق کے حوالے سے پاکستان کے اقدامات متاثر کن ہیں۔

اس موقع پر وزیر مذہبی امور پیر نور الحق قادری نے کہا کہ پاکستان ایک پُر امن ملک ہے اور پُر امن بقائے باہمی کیلئے پوری دنیا کے ساتھ تعاون کیلئے ہر دم تیار ہے۔

وزیر مذہبی امور پیر نور الحق قادری کا مزید کہنا تھا کہ پاکستان خلوصِ نیت سے تمام مذہبی اکائیوں  کو حقوق و آزادی دلانے کیلئے سرگرم عمل ہے، ہم اقلیتوں کیلئے اپنے مذہب اور آئین  میں متعین کردہ حقوق کی فراہمی کو جاری رکھیں گے۔

دوسری جانب پروفیسر قطب مصطفی ثانو، سیکرٹری جنرل ،عالمی اسلامک فقہی اکیڈمی سعودی عرب  کی بھی وزیر مذہبی امور سے ملاقات ہوئی۔

پروفیسر قطب مصطفی نے کہا کہ وزیراعظم عمران خان کو اسلاموفوبیا کے تدارک کی کامیاب قرارداد پر خراج تحسین پیش کرتے ہیں، اسلامی تعاون تنظیم کی فقہی کونسل اسلاموفوبیا کے تدارک کے حوالے سے ہر ممکن تعاون کیلئے تیار ہے

سیکرٹری جنرل عالمی اسلامی فقہی اکیڈمی سعودی عرب کا کہنا تھا کہ افغانستان کیلئے انسانی ہمدردی کا پیغام دنیا کیلئے قابل تقلید قدم ہے۔

دونوں رہنماوں نے باہمی تعاون کیلئے  سعودی پاک مفاہمت کی یاداشت پر اتفاق رائے جبکہ فقہی مسائل کے حل کیلئے دونوں ممالک کے علماء کرام پر مشتمل جوائنٹ فورم تشکیل دینے کی تجویز دی۔

پیر نور الحق قادری نے کہا کہ اسلامی تعاون تنظیم کی سطح پر سعودی عرب کی اسلامی فقہی اکیڈمی کی خدمات کو سراہتے ہیں، رمضان المبارک کے بعد جدہ یا اسلام آباد میں جوائنٹ فورم کے قیام کی تجاویز کو حتمی شکل دی جائے گی۔