سوئٹزرلینڈ کے شہر مونٹریکس میں ایک فرانسیسی خاندان کے چار افراد نے ساتویں منزل کے اپارٹمنٹ سے چھلانگ لگا کر خودکشی کرلی۔

جنیوا جھیل پر کیسینو کے قریب گزشتہ جمعرات پیش آنے والے اس سانحے میں ایک 15 سالہ لڑکا بچ گیا تھا، جسے فوری طور پر ہسپتال منتقل کیا گیا، جہاں اس کی حالت مستحکم حالت ہے لیکن وہ کومہ میں ہے۔

واؤڈ ریجنل پولیس نے منگل کو اپنے بیان میں کہا کہ جائے وقوعہ پر زبردستی یا ہنگامے کا کوئی نشان نہیں ہے اور تفتیشی نتائج “کسی تیسرے فریق کی مداخلت کو مسترد کر رہے ہیں”۔

پولیس اور استغاثہ “اجتماعی خودکشی” کے نظریہ پر کام کر رہے ہیں۔

پولیس کے مطابق، ایک 40 سالہ شخص، اس کی 41 سالہ بیوی، جڑواں بہن، جوڑے کی آٹھ سالہ بیٹی اور ان کا بیٹا سبھی “معاشرے سے ہٹ کر” زندگی گزار رہے تھے۔

تفتیش کاروں نے بتایا کہ دو افسروں نے صبح 6.15 بجے اپارٹمنٹ کا دروازہ کھٹکھٹایا، وہ اپنے بیٹے کے لیے ہوم اسکولنگ کے انتظامات کے بارے میں والد سے بات کرنا چاہتے تھے۔ تاہم وہ اندر داخل نہ ہو سکے اور انہیں واپس جانا پڑا۔

پولیس نے کہا کہ “وبائی بیماری کے آغاز کے بعد سے، خاندان کو سازش اور بقا کے نظریات میں بہت دلچسپی تھی”۔

یہ خاندان خود کفالت کی زندگی گزار رہا تھا، انہوں نے خوراک کا ذخیرہ جمع کر رکھا تھا، جس نے ان کے رہنے کی جگہ کا زیادہ تر حصہ گھیر رکھا تھا۔

صرف ماں کی جڑواں بہن گھر سے باہر کام کرتی تھی، جب کہ نہ تو ماں اور نہ ہی آٹھ سالہ بچی جو اسکول بھی نہیں جاتی تھی، مقامی حکام کے پاس رجسٹرڈ تھیں۔

پولیس کے بیان میں کہا گیا ہے کہ “یہ تمام عناصر تجویز کرتے ہیں انہیں اپنی زندگیوں میںحکام کی مداخلت کا خوف تھا۔”

فرانس کے جرنل ڈو ڈیمانچے اخبار نے اپنی رپورٹ میں کہا کہ والد ایرک ڈیوڈ، مارسیل کے ایک امیر علاقے میں پلے بڑھے اور انہوں نے ایکول پولی ٹیکنک میں تعلیم حاصل کی، جو ملک کے سب سے مشہور اسکولوں میں سے ایک ہے۔

ہفت روزہ نے بتایا کہ جڑواں بہنیں، نسرین اور نرگس فیرعون، پانچ بچوں کے خاندان میں پلی بڑھیں جو سبھی پیرس کے ایلیٹ لائسی ہنری IV میں تعلیم یافتہ تھے۔ ماں ڈینٹسٹ تھی اور اس کی بہن ایک ماہر امراض چشم۔

اخبار نے یہ بھی کہا کہ جڑواں بچے الجزائر کے ناول نگار مولود فیرعون کی پوتیاں ہیں۔ فرانسیسی فلسفی البرٹ کاموس کے ایک قریبی دوست، فیرعون کو 1962 میں ایک انتہائی دائیں بازو کے فرانسیسی نواز نوآبادیاتی گروپ نے الجزائر میں قتل کر دیا تھا۔