متحدہ عرب امارات سے 2 مزید خصوصی طیارے یو این کمیشن فار رفیوجیز کا امدادی سامان لیکر کراچی ایئرپورٹ پہنچ گئے ہیں۔

تفصیلات کے مطابق یو اے ای ایئرفورس کے طیارے اقوام متحدہ کی ایجنسیوں کا سامان لے کر آئے ہیں۔

کراچی ایئر پورٹ پر طیارے کی آمد کے موقع پر یو اے ای سفارتخانے، این ڈی ایم اے اور پاک آرمی 5 کور کے اعلیٰ حکام موجود تھے۔

واضح رہے کہ متحدہ عرب امارات سے پہنچنے والی دسویں اور گیارہویں پرواز میں سیلاب متاثرین کی ضروریات کا سامان شامل ہے۔

متحدہ عرب امارات سے سیلاب متاثرین کیلئے امداد کی آمد کا سلسلہ جاری

چند روز قبل بھی متحدہ عرب امارات سے سیلاب متاثرین کیلئے امدادی سامان لے کر طیارہ کراچی ایئرپورٹ پر پہنچ گیا تھا۔

یو اے ای سے آئے طیارے میں سیلاب متاثرین کیلئے کھانے پینے کی اشیاء، خیمے، کمبل لائے گئے تھے۔

سندھ سیلاب متاثرین کے لیے امدادی سامان سے متعلق اماراتی سفارتخانہ نے وزارتِ خارجہ کو تحریری طور پر آگاہ کیا تھا۔

متحدہ عرب امارات کا سیلاب متاثرین کیلئے امداد جاری رکھنے کا عزم

متحدہ عرب امارات کی جانب سے پاکستان کے سیلاب متاثرین کیلئے امداد جاری رکھنے کا عزم کیا گیا ہے۔

وزیر اعظم شہباز شریف نے کہا کہ متحدہ عرب امارات نے پاکستان میں سیلاب متاثرین کے لیے پچاس ملین ڈالر کی امدادی سامان کی پہلی قسط کی فراہمی شروع کر دی۔

 انہوں نے کہا کہ متحدہ عرب امارات کے صدر محمد بن زید النہیان نے بدھ کی رات ان سے ٹیلی فونک گفتگو میں یقین دلایا کہ متحدہ عرب امارات سیلاب متاثرین کی مدد جاری رکھے گا۔

‘متحدہ عرب امارات کا مشکل حالات میں مدد کرنے پر شکریہ ادا کرتے ہیں’

وزیر اعظم شہباز شریف نے کہا کہ متحدہ عرب امارات کا مشکل حالات میں مدد کرنے پر خصوصی شکریہ ادا کرتے ہیں۔

شہباز شریف نے اپنے ایک بیان میں کہا تھا کہ یو اے ای انسانی ہمدردی کی بنیاد پر راہداری کے قیام سمیت سیلاب زدگان کی مسلسل مدد کے لیے پیش پیش رہا۔

ان کا کہنا تھا کہ یو اے ای ریڈ کریسنٹ کا بھی شکریہ ادا کرتا ہوں کہ انہوں نے سیلاب کی امدادی کوششوں میں مدد کے لیے عطیہ کی مہم شروع کی۔