وزیراعظم آزاد جموں و کشمیر سردار تنویر الیاس خان نے کہا ہے کہ ملک کی ترقی کیلئے سب کو مل کر بیٹھنا ہوگا۔

تفصیلات کے مطابق وزیر اعظم آزاد جموں و کشمیر سردار تنویر الیاس خان نے اپنے ایک بیان میں کہا کہ وفاقی حکومت آزاد جموں و کشمیر میں تحریک انصاف کی حکومت گرانے کی کوششیں کر رہی ہے مصد نوٹوں سے بھرے بریف کیس بھی وفاقی حکومت نے مظفر آباد بھجوا دیئے ہیں جبکہ نوٹوں سے بھرے بریف کیس کشمیر کاز کیلیے نقصان دہ ہیں۔

انہوں نے کہا کہ آزادجموں و کشمیر کے ایم ایل ایز کو خریدنے کی کوشش کی جارہی ہے اور یہ گند جاری رکھا گیا تو آزاد جموں و کشمیر کے عوام سڑکوں پر آجائیں گے۔

ان کا کہنا تھا کہ آزادجموں و کشمیر میں سیاسی استحکام کا ہونا ضروری ہے جبکہ ایل او سی کے پار تکمیل پاکستان کی جنگ بھی جاری ہے اور اس سے آزاد جموں و کشمیر میں جنگ و جدل اور سیاسی ابتری میں اضافہ ہوگا۔

یہ بھی پڑھیں؛ ہم نے عمران خان کے ساتھ یکجہتی کا فیصلہ کیا ہے، سردار تنویر الیاس

سردار تنویر الیاس خان نے کہا کہ وفاق کو ہٹ دھرمی کا مظاہرہ نہیں کرنا چاہیئے بلکہ الیکشن کی طرف جانا چاہیئے اور اگر وفاق کے زور پر پی ڈی ایم نے تحریک انصاف آزاد جموں وکشمیر کی حکومت تبدیل کی تو ہم سڑکوں پر ہونگے۔

انہوں نے کہا کہ پنجاب اور خیبرپختونخواہ میں پاکستان تحریک انصاف کی حکومت ہے جبکہ پنجاب اور خیبر پختونخواہ کی حکومتیں الیکشن کا مطالبہ کر رہی ہیں۔

ان کا کہنا تھا کہ اپنے ملک کی ترقی اور سلامتی کیلئے مل کر بیٹھنا ہوگا جبکہ پاکستان تحریک انصاف الیکشنز کا جمہوری مطالبہ کر رہی ہے۔

یہ بھی پڑھیں؛ حکومتِ عوام کے مسائل کو ترجیحی بنیادوں پر حل کرنے کیلئے کوشاں ہے، تنویر الیاس

سردار تنویر الیاس خان نے کہا کہ عوام کی عدالت میں جانے سے سیاسی قوتوں کو گھبرانا نہیں چاہیئے، پاکستان سپریم ہے باقی سب بعد میں ہے۔

انہوں نے کہا کہ آزاد جموں وکشمیر پاکستان کی دفاعی فصیل ہے۔

ان کا کہنا تھا کہ پاکستان کے اندر معاشی بے چینی پر ہمیں تشویش ہے اور ہمیں کسی بھی صورت سیاسی استحکام پیدا کرنا ہے۔

وزیر اعظم آزاد جموں و کشمیر سردار تنویر الیاس خان نے مزید کہا کہ سیاسی قیادتوں کا کام ہے وہ سر جوڑ کر بیٹھیں اور مسئلے کا حل نکالیں جبکہ تمام اسٹیک ہولڈرز کو بھی اس مسئلے کا حل نکالنا چاہیئے۔