مسلم لیگ ن کے اجلاس میں دعویٰ کیا گیا ہے کہ وزیراعلیٰ پنجاب کے پاس اعتماد کا ووٹ لینے کیلئے نمبرز پورے نہیں ہیں۔

تفصیلات کے مطابق وزیراعظم شہباز شریف کی زیرصدارت مسلم لیگ ن کی سینئر قیادت کا اجلاس ہوا جس میں ملک بھر کی مجموعی سیاسی صورتحال خصوصا پنجاب کی موجودہ صورتحال پر تفصیلی تبادلہ خیال کیا گیا۔

اجلاس میں وزیراعلیٰ پنجاب اور کابینہ کی بحالی کے بعد کی صورتحال پر بھی مشاورت کی گئی اور وزیراعلیٰ پنجاب کو گورنر کی جانب سے اعتماد کا ووٹ لینے کے آئینی حکمنامہ پر بھی غور کیا گیا۔

یہ بھی پڑھیں: عدالت نے وزیراعلیٰ پنجاب کو بحال کرنےکاتحریری حکم جاری کردیا

وزیراعظم کو بریفنگ میں بتایا گیا کہ وزیراعلیٰ چاہے اس معاملے کو جتنا بھی تاخیر کا شکار کر لیں لیکن انہیں بہرصورت اعتماد کا ووٹ لینا ہی ہو گا تاہم وزیراعلیٰ پنجاب کے پاس اعتماد کا ووٹ لینے کے لئے نمبرز پورے نہیں ہیں۔

اجلاس میں دعویٰ کیا گیا کہ اعتماد کا ووٹ نہ لے پانے سے جنوری میں پنجاب سے پی ٹی آئی کی حکومت ختم ہو جائے گی۔

علاوہ ازیں وفاقی وزیر داخلہ رانا ثناء اللہ نے وزیراعظم ہو گذشتہ روز اسلام آباد میں ہونے والے دھماکے کے حوالے سے ابتدائی رپورٹ پیش کی گئی ہے۔

خیال رہے کہ اجلاس میں وفاقی وزیر داخلہ رانا ثناء اللہ، وفاقی وزیر قانون اعظم نذیر تارڑ سمیت پاکستان مسلم لیگ ق کے رہنما اور وفاقی وزیر طارق بشیر چیمہ شریک ہوئے ۔

یہ بھی پڑھیں؛ عدالت نے وزیراعلیٰ پنجاب اور پنجاب کابینہ کو فوری بحال کردیا