پاکستان تحریک انصاف (پی ٹی آئی) کی انتخابی ٹکٹوں کی تقسیم کے معاملے پر چیئرمین عمران خان نے جلد پنجاب اور خیبر پختونخوا میں انتخابی امیدواروں کو فانئل کرنے کا فیصلہ کرلیا ہے۔

تفصیلات کے مطابق تحریک انصاف کے چیئرمین عمران خان نے ٹکٹوں کی تقسیم پر تمام ڈویژن کے کوآرڈینیٹر سے ملاقاتیں شروع کردی ہیں، عمران خان آج تحریک انصاف سے نارتھ پنجاب کے کوآرڈینیٹرز ملاقات کریں گے۔

چیئرمین پی ٹی آئی عمران خان نے ہر ڈویژن کے کوآرڈینیٹر سے امیدواروں کی ابتدائی فہرستیں لینا شروع کردیں۔ حلقے سے شارٹ لسٹ کیے گئے امیدواروں کا عمران خان خود انٹرویو کریں گے۔

گزشتہ روز ویسٹ پنجاب ریجن کے پارلیمانی بورڈ نے چیئرمین تحریک انصاف سے ملاقات کی تھی، اس موقع پر فیصل آباد ڈویژن اور ساہیوال ڈویژن کے صوبائی اسمبلی کے امیدواروں کی ابتدائی فہرستوں پر آگاہ کیا گیا۔

علاوہ ازیں ڈویژنل کوآرڈینیٹرز کی جانب سے ہر نشست پر پانچ پارٹی رہنماؤں کے نام تجویز کیے جارہے ہیں۔

یہ بھی پڑھیں؛ انتخابات میں تاخیر آئین شکنی ہوگی، ایسا ہوا تو آرٹیکل 6 کی کارروائی کریں گے، پی ٹی آئی

 ابتدائی فہرستیں مرکزی پارلیمانی بورڈز میں منظوری کے لئے پیش کی جائیں گی اور مرکزی پارلیمانی بورڈ عمران خان کی زیرصدارت اجلاس میں ٹکٹوں کے لئے حتمی فیصلے کرے گا۔

پنجاب اور خیبرپختونخوا اسمبلی کے انتخابات کب ہونگے؟

الیکشن کمیشن پنجاب اور خیبرپختونخوا اسمبلی کے انتخابات اپریل میں کرائے گا جبکہ پنجاب اور کے پی اسمبلی کے انتخابات پر 15 ارب روپے سے زائد کے اخراجات آئیں گے۔

ذرائع کا کہنا تھا کہ خیبرپختونخوا اور پنجاب کے انتخابات عام انتخابات سے قبل کرانے پر اخراجات میں 20 ارب روپے کا اضافہ ہوگا۔

دوسری جانب الیکشن کمیشن آف پاکستان نے پنجاب اور خیبر پختونخوا میں انتخابات کی تاریخیں تجویز کردی ہیں۔