پاکستان تحریک انصاف (پی ٹی آئی) کی رہنما یاسمین راشد اور سابق وفاقی وزیراعجاز شاہ کی مبینہ آڈیو لیک سامنے آگئی ہے، جو عمران خان کی گرفتاری سے متعلق گفتگو پرمشتمل ہے۔

تفصیلات کے مطابق یاسمین راشد اور سابق وفاقی  وزیر اعجاز شاہ کے درمیان پنجابی میں گفتگو ہوئی جس میں یاسمین راشد نے کہا کہ میری عمران خان سے بات ہوئی ہے انہوں نے ہدایت دی ہے کہ سارے ایم این ایز اور ایم پی ایز کو فون کرو۔

پی ٹی آئی رہنما یاسمین راشد اور سابق وفاقی وزیراعجاز شاہ کی مبینہ آڈیو لیک سامنے آگئی#ShoaibShaikhBayQasoor #ReleaseShoaibShaikh pic.twitter.com/ugqiKpOYi0

— BOL Network (@BOLNETWORK) March 15, 2023

مبینہ آڈیو لیک میں یاسمین راشد نے اعجاز شاہ کو بتایا کہ خان صاحب نے کہا ہے کہ جو بندے لے کر نہ پہنچا ٹکٹ نہیں دوں گا۔

گفتگو کے دوران یاسمین راشد نے اعجاز شاہ سے کہا کہ ایم پی ایز اور ایم این ایز کو بولیں بندے لے کر پہنچیں، جس پر سابق وزیر داخلہ اعجاز شاہ نے جواب دیا کہ میں فون کررہا ہوں۔

واضح رہے کہ زمان پارک میں آج ایک بار پھر چیئرمین پی ٹی آئی عمران خان کو گرفتار کیے جانے کا خدشہ ہے جس کی پیش نظر پولیس اور کارکنان میں تصادم کا  سلسلہ جاری ہے۔

پولیس اور تحریک انصاف کے کارکنوں کے درمیان پتھراو اور شیلنگ کا سلسلہ وقفے وقفے سے جاری  ہے جبکہ پولیس کی جانب سے شیلنگ اور پتھراؤ کے باعث زمان پارک میں مقیم رہاشیوں کی املاک کو نقصان پہنچا ہے۔

اس کے علاوہ آنسو گیس کی شیلنگ اور پتھراؤ کے باعث کئی گھروں کی کھڑکیوں کے شیشے ٹوٹ گئے  ہیں جبکہ آنسو گیس کی شیلنگ کے باعث زمان پارک کے رہائشیوں کو شدید مشکلات کا سامنا ہے۔

یہ بھی پڑھیں: پی ٹی آئی رہنماؤں اور کارکنوں کیخلاف کئی شہروں میں مقدمات درج

پولیس کی ناکہ بندی کے باعث آنسو گیس کے متاثرین کو طبی امداد دینے میں بھی مشکلات کا سامنا ہے جبکہ زمان پارک کے رہائشی ناکہ بندی کے باعث گھروں میں مبحوس ہوکر رہ گئے ہیں۔

پولیس کی جانب سے آنسو گیس ک شیل لگنے سے کئی افراد زخمی ہوگئے ہیں جبکہ شیر خوار بچے بھی آنسو گیس سے شدید متاثر ہوئے ہیں۔

علاوہ ازیں مسلح پولیس تحریک انصاف کے کارکنوں پر سیدھے فائر اور شیلنگ کررہے ہیں جس کے بعد ایک بار پھر زمان پارک کو میدان جنگ میں تبدیل کر دیا ہے۔