لاہور: سابق وزیراعظم شہباز شریف اور مسلم لیگ ن کی چیف آرگنائزر مریم نواز شریف نے بھارتی سپریم کورٹ کے فیصلے کو ایک اور بھارتی جھوٹ قرار دے دیا۔

پاکستان مسلم لیگ (ن) کے صدر شہباز شریف نے مقبوضہ جموں و کشمیر سے متعلق بھارتی سپریم کورٹ کے فیصلے کو مسترد کرتے ہوئے کہا کہ 5 اگست 2019 کی طرح بھارتی سپریم کورٹ کے فیصلے کی بھی کوئی حیثیت نہیں ہے، بھاتی سپریم کورٹ کا فیصلہ اقوام متحدہ کی قرارداوں کے منافی ہے، اس لئے یہ فیصلہ عالمی قوانین کی خلاف ورزی ہے، یہ فیصلہ دیکر بھارتی سپریم کورٹ نے عالی جرم کیا ہے۔

انہوں نے کہا کہ عالمی قانون، سلامتی کونسل کی قراردادیں جموں وکشمیر کو متنازعہ خطہ اور مسئلہ تسلیم کرتی ہیں، عالمی قانون، سلامتی کونسل کی قراردادوں کو بھارتی سپریم کورٹ یا بھارتی حکومت کا کوئی اقدام ختم نہیں کرسکتا۔

شہباز شریف نے کہا کہ جموں وکشمیرعالمی سطح پر مسلمہ تنازعہ، بھارتی سپریم کورٹ کے کہنے سے اٹوٹ انگ کا جھوٹ سچ نہیں ہوجائے گا، بھارتی سپریم کورٹ نے بی جے پی کی پالیسی پر ایک کارکن بن کر عمل کیا۔

انکا کہنا تھا کہ بھارتی سپریم کورٹ اس سے قبل بابری مسجد پر بھی کھلی لاقانونیت کرچکی ہے، یہ فیصلہ کشمیریوں کی قربانیوں کو ختم نہیں کر سکتا، ایسے متعصب فیصلے سے جدو جہد آزادی  مقبوضہ کشمیر میں تیزی آئے گی۔

سابق وزیراعظم نے کہا کہ 5 اگست 2019 کے بعد سلامتی کونسل اپنے اجلاس میں تنازعہ جموں وکشمیر کی متنازعہ مسلمہ عالمی حیثیت کا اعادہ کرچکی ہے، اسلامی تعاون تنظیم (او آئی سی) بھی اپنے اجلاسوں، قراردادوں اور اعلامیوں کے ذریعے جموں وکشمیر کے متنازعہ ہونے کو تسلیم کرتی ہے۔

انہوں نے کہا کہ بھارتی ظلم وجبر، 5 اگست 2019 اور بھارتی سپریم کورٹ کے عامی قوانین کے منافی فیصلوں سے کشمیریوں کو ان کی آزادی سے محروم نہیں کیا جاسکتا، ایسے ہتھکنڈوں سے دنیا کی آنکھوں میں نہ دھول جھونکی جاسکتی ہے نہ ہی جموں وکشمیر پر عالمی پوزیشن تبدیل ہوگی۔

شہباز شریف نے مزید کہا کہ بھارت مقبوضہ جموں وکشمیر پر اپنے ناجائز اور غیرقانونی قبضے کو طول دینے کے لئے عالمی قوانین اور اقوام متحدہ کی قراردادوں کی خلاف ورزی کر رہا ہے، بھارت اوچھے ہتھکنڈے چھوڑ کر تنازعہ جموں وکشمیر کے منصفانہ اور سلامتی کونسل کی قراردادوں کے مطابق حل کی سنجیدہ کوششوں کی طرف آئے۔

دوسری جانب پاکستان مسلم لیگ (ن) کی سینئر نائب صدر اور چیف آرگنائزر مریم نواز شریف نے بھارتی سپریم کورٹ کے فیصلے کو ایک اور بھارتی جھوٹ قرار دیتے ہوئے کہا کہ کشمیری عوام، پاکستان اور دنیا بھارتی فریب کو مسترد کرتے ہیں، بھارتی سپریم کورٹ نے تاریخی جرم کیا۔

انکا کہنا تھا کہ بھارت سو ناٹک کرے، جموں و کشمیر کشمیریوں کا ہے کشمیریوں کا ہی رہے گا، بھارت کے کشمیریوں کو غلام بنانے کے تمام ہتھکنڈے ناکام ہو چکے ہیں۔

مریم نواز نے مزید کہا کہ تنازعہ جموں و کشمیر پر سلامتی کونسل کی قراردادوں اور عالمی قانون کا اطلاق ہوتا ہے، کشمیر کے عوام کا آزادی اور استصواب رائے کا حق نہیں چھینا جا سکتا، جموں و کشمیر عالمی سطح پر تسلیم شدہ متنازعہ مسئلہ ہے کوئی بھی بھارتی ہتھکنڈا اس مسلمہ عالمی تنازع کی حیثیت تبدیل نہیں کر سکتا۔