یونان کے ساحلی علاقے میں تارکین وطن کو لے جانے کشتی الٹنے سے دو افراد ہلاک ہو گئے ہیں، جبکہ 16 افراد لاپتہ ہیں۔

عرب میڈیا کے مطابق یونان کے جزیرے لیسبوس کے قریب بحیرہ ایجیئن میں تارکین وطن کو لے جانے والی ایک کشتی الٹنے سے کم از کم دو افراد ہلاک جبکہ 16 افراد لاپتہ ہیں۔

ترکی کے ساحل سے آنے والی ایک کشتی مقامی وقت کے مطابق صبح تین بجے لیسبوس کے مشرق میں واقع اگیوس جارجیوس کے پتھریلے ساحلوں پر تیز ہواؤں کی زد میں آ گئی۔

ریسکیو اہلکاروں کے مطابق کشتی میں 36 افراد سوار تھے۔

کوسٹ گارڈ کے دفتر کے ایک عہدیدار کے مطابق حکام کا کہنا ہے کہ انہیں 18 تارکین وطن ملے ہیں جو کشتی سے اترنے میں کامیاب ہوگئے تھے جبکہ ساحل کے قریب سمندر میں دو لاشیں بھی ملی تھیں۔

حکام کا کہنا ہے کہ کشتی کے ڈوبنے کے بعد دیگر 16 افراد منتشر ہوگئے اور اب بھی لاپتہ ہیں۔

کوسٹ گارڈ کی گشتی کشتیاں بدھ کے روز خراب موسم کی وجہ سے کشتی رانی پر پابندی کی وجہ سے سمندر میں تلاشی لینے کے قابل نہیں تھیں۔

لیسبوس کا جزیرہ یورپی یونین میں داخل ہونے کے خواہشمند تارکین وطن کے لیے داخلی راستوں میں سے ایک ہے۔

یونان نے یورپی یونین کے سرحدی تحفظ کے ادارے فرنٹیکس کی مدد سے بحیرہ ایجیئن میں گشت بڑھا دیا ہے۔

جون میں پیلوپونیز میں پائلوس کے قریب ایک خستہ حال کشتی الٹ گئی تھی جس کے نتیجے میں 82 افراد ڈوب گئے تھے جبکہ سیکڑوں افراد کے لاپتہ ہونے کی اطلاعات ہیں۔

زندہ بچ جانے والوں میں سے چالیس نے یونانی حکام کے خلاف اجتماعی مقدمہ دائر کیا ہے جس میں الزام لگایا گیا ہے کہ وہ کشتی ڈوبنے سے قبل مناسب کارروائی کرنے میں ناکام رہے۔