باجوڑ: تحصیل ماموند کے علاقہ ڈمہ ڈولہ میں ہونے والے بم دھماکے میں سابق سینیٹر ہدایت اللہ سمیت 5 افراد شہید ہوگئے۔

باجوڑ کی تحصیل ماموند کے علاقے ڈمہ ڈولہ میں سابق سینیٹر ہدایت اللہ کی گاڑی پر ریموٹ کنٹرول بم دھماکہ ہوا جس کے نتیجے میں پانچ افراد شہید ہوگئے۔

دھماکے میں سابق سینیٹر ہدایت اللہ بھی شہید ہوگئے ہیں، علاوہ ازیں ملک عرفان، نظر الدین، یار محمد اور سمیع الرحمان بھی شہید ہوگئے ہیں۔

تمام پانچوں شہداء کی لاشیں ڈسٹرکٹ ہیڈ کوارٹر اسپتال خار باجوڑ منتقل کردی گئی ہیں، سابق سینیٹر ہدایت اللہ خان سال 2012 سے لے کر 2024 تک سینیٹ کے ممبر رہے۔

وہ دو بار فاٹا سے اۤزاد حیثیت سے سینیٹ کے ممبر رہ چکے ہیں جب کہ وہ نیکٹا کے ممبر اور سینیٹ کی اسٹینڈنگ کمیٹی برائے ہوابازی کے چیئرمین بھی رہے ہیں۔

سینیٹر ہدایت اللہ کا تعلق ناؤگئی سے تھا اور وہ سابق گورنر خیبر پختونخوا انجیینئر شوکت اللہ خان کے چھوٹے بھائی اور سابق ایم این اے حاجی بسم اللہ خان کے صاحبزادے تھے۔

ہدایت اللہ خان اپنے بھتیجے اۤزاد امیدوار پی کے 22 نجیب اللہ خان کے الیکشن مہم کے سلسلے میں ڈمہ ڈولہ گئے تھے، نجیب اللہ خان 11 جولائی کو پی کے 22 پر ضمنی الیکشن کےلئے امیدوار ہیں۔

ہدایت اللہ خان ساتھیوں کے ہمراہ الیکشن مہم کے بعد ڈمہ ڈولہ سے واپس ہیڈ کوارٹر خار اۤرہے تھے کہ راستے میں ان کی گاڑی کو نشانہ بنایا گیا۔