اسلام آباد احتساب عدالت نے توشہ خانہ گاڑیوں کا ریفرنس واپس بھیجنے کے حوالے سے کیس کی سماعت کا فیصلہ محفوظ کرلیا۔

احتساب عدالت کی جج عابدہ سجاد نے سماعت کرتے ہوئے کہا کہ نیب نے اپنا جواب جمع کروا دیا ہے۔ وکیل فاروق ایچ نائیک نے عدالت سے کہا کہ ہمیں کاپیاں ابھی تک نہیں ملی۔

جج نے وکیل سے مکالمے میں کہا کہ میں نے ہدایت دیدی تھی آپ کو کاپیاں کیوں نہیں دی گئیں۔ اس کے ساتھ ہی عدالتی عملہ نے نیب کا جواب فاروق ایچ نائیک کو فراہم کردیا۔

ڈپٹی ڈی جی پراسیکیوٹر نیب بھی کمرہ عدالت میں پیش ہوئے۔

وکیل فاروق ایچ نے کہا کہ زندگی کا کوئی بھروسہ نہیں ان کیسز میں بہت سے ججزکو ریٹائرڈ ہوتے دیکھا ہے، آخر میں ہم ہی بچیں ہیں، میری استدعا ہے کہ کیس ایف آئی اے ایجنسی کو بھیجا جائے وہی عدالت بھیجے۔

ڈپٹی ڈی جی نیب نے کیس ایف آئی اے ایجنسی کو بھیجنے پراعتراض کرتے ہوئے کہا کہ ایجنسی کیسے ایگزمن کرے گی۔

وکیل فاروق ایچ نائیک نے جواب دیا کہ یہ کیس نیب سیکشن نائن کے تحت ہوا اوربیان بھی ریکارڈ ہوئے، اس کیس میں دوبارہ انکوائری ہوگی اور انکوائری ایجنسی ہی کریگی۔

جج نے استفسارکیا کہ بانی پی ٹی آئی کے کیس میں کیا ہوا تھا، وکیل نے بتایا کہ اس میں چالان آگیا تھا اس وجہ سے عدالت کو منتقل کیا گیا تھا۔

یوسف رضا گیلانی، نوازشریف و دیگر ملزمان کے وکلا نے فاروق ایچ نائیک کے دلائل پراتفاق کیا۔ اس کے ساتھ ہی عدالت نے ریفرنس ایف آئی اے ایجنسی یا اسپیشل جج سینٹرل کو بھیجنے پرفیصلہ محفوظ کرلیا جو21 نومبرکوسنایا جائیگا۔