واشنگٹن: بھارتی خفیہ ایجنسی را کی مجرمانہ سرگرمیوں کا ایک اور انکشاف سامنے آیا ہے جب امریکی عدالت میں مودی حکومت کی سرپرستی میں قتل کی سازش کا بھانڈا پھوٹ گیا۔

امریکی حکام کے مطابق بھارتی حکومت کے لیے کام کرنے والے ایجنٹ نے امریکہ میں سکھ رہنما گرپتونت سنگھ پنوں کے قتل کی منصوبہ بندی کی تھی جس کے تحت نیویارک میں ایک بھارتی ایجنٹ نے 15 ہزار ڈالر کی ادائیگی کی۔

امریکی محکمہ انصاف نے بھارتی ایجنسی را کے ایک ایجنٹ وکاش یادو کی شناخت کرلی ہے جو اس منصوبے میں براہ راست ملوث پایا گیا ہے۔

سرکاری دستاویزات میں انکشاف کیا گیا ہے کہ نیویارک میں 27 اسٹریٹ اور 11 ایونیو کے مقام پر بھارتی ایجنٹ نے 15 ہزار ڈالر کی ادائیگی کی جس کا ریکارڈ بھی امریکی عدالت میں پیش کردیا گیا ہے۔

امریکی عدالت میں بھارتی جاسوسوں کے نیٹ ورک پر شکنجہ کسا جا رہا ہے اور را کی غیر قانونی سرگرمیوں کے مزید شواہد بھی سامنے آ رہے ہیں۔

امریکی حکام کا کہنا ہے کہ مودی حکومت کے حکم پر بھارتی ایجنٹ نے قتل کے لیے رقم فراہم کی جو عالمی قوانین کی سنگین خلاف ورزی ہے۔

بھارت کی اس غیر قانونی کارروائی کے بعد امریکہ میں مودی حکومت کے خلاف سخت اقدامات کا آغاز کردیا گیا ہے۔

امریکی حکام نے نیویارک میں ضبط شدہ رقم کی تفصیلات بھی عدالت میں پیش کردی ہیں جس سے بھارت کے ریاستی دہشت گردی میں ملوث ہونے کے شواہد مزید مضبوط ہوگئے ہیں۔