وفاقی وزیر منصوبہ بندی پروفیسر احسن اقبال نے چین کے شہر ہونان میں بی ڈو سمٹ میں شرکت کی، جہاں انہوں نے چینی نائب وزیر اعظم لی چھیانگ سے اہم ملاقات کی۔
وفاقی وزیر نے سمٹ سے خطاب کرتے ہوئے بی ڈو نیویگیشن سسٹم کو پاکستان کی معیشت، روزگار اور عالمی شراکت داری میں انقلابی کردار کا حامل قرار دیا۔
احسن اقبال نے کہا کہ بی ڈو نظام ہوابازی، زراعت، لاجسٹکس اور آفات میں ریسکیو و مواصلاتی سرگرمیوں میں بھرپور استعمال ہو رہا ہے، اور پاکستان بی ڈو استعمال کرنے والا پہلا غیر ملکی ملک ہے۔
انہوں نے کہا کہ یہ نظام سی پیک، ڈیجیٹل معیشت، میری ٹائم سیفٹی اور تجارت میں بے شمار مواقع پیدا کرے گا۔
وزیر منصوبہ بندی نے بی ڈو سمٹ میں پاکستان کی ترقی کے لیے چھ نکاتی فارمولا پیش کیا اور بی ڈو کے مکمل استعمال کو پاک-ایس بی اے ایس اور جی بی اے ایس سے مربوط کرنے کی تجویز دی۔
انہوں نے جی بی اے ایس کی ملک بھر میں کوریج بڑھانے اور نیشنل سینٹر برائے جی آئی ایس و سیٹلائٹ ٹیکنالوجی کو بی ڈو کا علاقائی مرکز بنانے کی پیشکش کی۔
احسن اقبال نے چین کے ساتھ پبلک-پرائیویٹ پارٹنرشپ بڑھانے اور پاکستانی سائنسدانوں کی نئی نسل کی تربیت کے لیے مشترکہ تحقیق و ٹیلنٹ ڈویلپمنٹ پر زور دیا۔
انہوں نے کہا کہ سی پیک اب صرف انفراسٹرکچر کا نہیں بلکہ اسپیس ٹیکنالوجی سے جڑا ایک جدید ٹیکنالوجی کوریڈور ہے، جس سے پاکستان اقوامِ متحدہ کے ترقیاتی اہداف کی جانب بڑھ رہا ہے۔
انہوں نے زور دیا کہ اڑان پاکستان کے تحت ٹیکنالوجی پر مبنی معیشت کی بنیاد رکھی جا رہی ہے اور نوجوانوں کو جدید ٹیکنالوجی سے آراستہ کرنا حکومت کی اولین ترجیح ہے۔
