پاکستان ڈرامہ اور فلم انڈسٹری کی معروف اداکارہ ماہرہ خان نے پہلی بار سیاست میں انٹری سے متعلق گردش کرتی خبروں پر واضح مؤقف دے دیا۔
پاکستانی سپر اسٹار ماہرہ خان نے ایک نجی ٹی وی کے پروگرام میں گفتگو کرتے ہوئے اپنی ذاتی زندگی، نئی فلم نیلوفر، پاک بھارت تعلقات اور اپنے سیاسی مؤقف پر کھل کر بات کی۔
انہوں نے بتایا کہ وہ اپنی رومانوی فلم نیلوفر کے حوالے سے بے حد پُرجوش ہیں اور شوبز کا سفر اُن کے لیے سیکھنے اور شکرگزاری سے بھرپور رہا ہے۔
بھارت میں کام کرنے کے تجربے پر بات کرتے ہوئے اداکارہ نے ایک بار پھر شاہ رخ خان کی تعریف کرتے ہوئے کہا کہ وہ خود کو خوش قسمت سمجھتی ہیں کہ اُنہیں اتنے بڑے اسٹار کے ساتھ کام کرنے کا موقع ملا۔ شاہ رخ سے متعلق جتنا عوامی طور پر کہنا تھا کہہ دیا، باقی ذاتی باتیں شیئر کرنا مناسب نہیں سمجھتیں۔
مزید پڑھیں: ماہرہ خان کے مداحوں کے لیے بڑی خوشخبری
مئی 2025 میں پاک بھارت جنگ کے دوران اپنے بیان سے متعلق بات کرتے ہوئے انہوں نے کہا کہ پاکستان کی حمایت کرنا اُن کا فرض بھی تھا اور ذمہ داری بھی۔ اس بیان سے بھارتی مداحوں کو ناراضی ہوئی ہوگی مگر انہیں اس پر کوئی افسوس نہیں، کیونکہ اپنے ملک کے معاملے پر وہ سمجھوتہ نہیں کرسکتیں۔
سیاست میں آنے کے سوال پر ماہرہ خان نے دوٹوک الفاظ میں کہا کہ نہ ان کی کوئی سیاسی خواہش ہے اور نہ وہ اس میدان کے لیے بنی ہیں۔
انہوں نے کہا کہ میرا سیاست میں آنے کا کوئی ارادہ نہیں، میں اپنی دنیا میں خوش ہوں اور صرف اپنے فن پر توجہ دینا چاہتی ہوں۔
آخر میں ماہرہ خان کا کہنا تھا کہ وہ آئندہ بھی صرف اپنے کام پر ہی فوکس رکھیں گی کیونکہ سیاست اُن کے راستے کا حصہ نہیں ہے۔
