معروف ماڈل اور ٹی وی میزبان متھیرا ایک بار پھر سوشل میڈیا کی توجہ کا مرکز بن گئیں۔
حالیہ فیشن شو میں ان کی ریمپ واک کی ویڈیو وائرل ہونے کے بعد متھیرا کو کچھ حلقوں کی جانب سے تنقید کا سامنا کرنا پڑا، جس پر انہوں نے سخت ردعمل دیا۔
سوشل میڈیا پر منفی تبصروں کے جواب میں متھیرا نے افسوس کا اظہار کرتے ہوئے کہا کہ لوگ میرے بارے میں بلاوجہ غلط باتیں پھیلارہے ہیں، میں صرف اپنی صحت اور خوشی پر توجہ دے رہی ہوں اور کسی بھی غیر مناسب کام میں ملوث نہیں ہوں۔
انہوں نے کہا کہ مجھے شو میں بطور ماڈل مدعو کیا گیا تھا۔ چند بیمار ذہنیت کے حامل افراد اور سوشل میڈیا پیجز میرے خلاف منفی تبصرے کر رہے ہیں، جس پر مجھے افسوس ہے۔
متھیرا نے اپنے صحت کے مسائل کا بھی ذکر کیا اور کہا کہ میری گھٹنے کی سرجری ہو چکی ہے اور تھائیرائڈ کی حالت بھی کافی خراب رہی لیکن اس کے باوجود لوگ ایسے رویے کا مظاہرہ کرتے ہیں۔
انہوں نے مزید کہا کہ میں اپنی زندگی اپنے لیے جی رہی ہوں، میں فخر سے کہہ سکتی ہوں کہ میں ایک چھوٹی سوچ رکھنے والے معاشرے میں رہنے والی ’بڑی‘ لڑکی ہوں۔
مزید پڑھیں: متھیرا کی ریمپ واک نے سوشل میڈیا پر نئی بحث چھیڑ دی
