کراچی: کراچی واٹر اینڈ سیوریج کارپوریشن نے بی آر ٹی کوریڈور میں واقع پرانے اور خستہ حال 60 انچ قطر کے وال کو جدید پائپ لائن سے تبدیل کرنے کا فیصلہ کرلیا۔
ترجمان کراچی واٹر اینڈ سیوریج کارپوریشن کے مطابق یہ قدم شہر میں پانی کی ترسیل کے نظام کو مزید محفوظ، مستحکم اور مؤثر بنانے کے لیے اٹھایا جارہا ہے۔
ترجمان نے بتایا کہ پیپلز سیکرٹریٹ کے قریب بی آر ٹی کوریڈور کے نیچے نصب اس بوسیدہ وال کی تبدیلی کا مرمتی شیڈول جاری کر دیا گیا ہے جس کے تحت کام 29 نومبر سے یکم دسمبر تک ہفتہ اور اتوار کے روز مکمل کیا جائے گا۔
انہوں نے کہا کہ اس دوران متاثرہ لائن کی عارضی بندش ناگزیر ہوگی جب کہ مرمتی سرگرمیوں کے باعث صدر ٹاؤن، جمشید روڈ، پی آئی بی اور لائنز ایریا میں پانی کی فراہمی متاثر ہوسکتی ہے۔
ترجمان کا مزید کہنا تھا کہ رہائشیوں کو پانی کی عارضی قلت کا سامنا کرنا پڑسکتا ہے لہٰذا شہریوں سے اپیل کی گئی ہے کہ وہ پانی کے استعمال میں احتیاط برتیں اور ضرورت کے مطابق پیشگی ذخیرہ کرلیں۔
