ٹی ٹوئنٹی ورلڈکپ کے سپر 8 مرحلے سے قبل قومی ٹیم کے حوصلے بلند ہیں اور کھلاڑی مضبوط حریفوں کے خلاف میدان میں اترنے کیلئے پرجوش دکھائی دے رہے ہیں۔ کپتان سلمان علی آغا کا کہنا ہے کہ ٹیم نیوزی لینڈ سمیت بڑی سائیڈز کے مقابلے کیلئے پوری طرح تیار ہے اور حالیہ فارم اعتماد بڑھا رہی ہے۔
سپر 8 میں سخت مقابلے
سپر 8 مرحلے میں پاکستان کرکٹ ٹیم کو نیوزی لینڈ کرکٹ ٹیم, انگلینڈ کرکٹ ٹیم اور سری لنکا کرکٹ ٹیم کا سامنا کرنا ہوگا، جسے ٹورنامنٹ کا فیصلہ کن مرحلہ قرار دیا جا رہا ہے۔
اس سے قبل قومی ٹیم نے سپر 8 میں جگہ نمیبیا کے خلاف یکطرفہ فتح سے بنائی، جہاں صاحبزادہ فرحان کی ناقابل شکست سنچری کی بدولت ٹیم نے 199 رنز بنائے, یہ ٹی 20 ورلڈکپ میں کسی پاکستانی بیٹر کی دوسری سنچری قرار دی گئی عثمان طارق نے 16 رنز دے کر 4 وکٹیں حاصل کرتے ہوئے میچ کا رخ بدل دیا
کپتان نے کہا کہ ٹیم نے پاور پلے میں تیز آغاز، درمیانی اوورز میں شراکت داری اور اختتامی اوورز میں مضبوط فنش کے ذریعے مکمل کارکردگی دکھائی۔
اعداد و شمار کے مطابق پاکستان نے ایونٹ میں اب تک 60 اوورز سے زائد اسپنرز سے کرائے جبکہ پیسرز کا استعمال محدود رہا۔
سلمان علی آغا کے مطابق سری لنکا کی کنڈیشنز میں اسپن بولنگ میچ وننگ ہتھیار ثابت ہو سکتی ہے، جبکہ پیسرز اور آل راؤنڈرز بھی اہم کردار ادا کریں گے۔
قومی کپتان کا کہنا تھا کہ نیوزی لینڈ کے خلاف میچ میں اگر نمیبیا جیسی کارکردگی دہرائی گئی تو مثبت نتیجہ ملنے کے امکانات روشن ہیں۔
انہوں نے صاحبزادہ فرحان کی بیٹنگ اور عثمان طارق کی بولنگ کو ٹیم کی حالیہ کامیابی کا اہم عنصر قرار دیا۔
