آج کی تاریخ میں کسی بھی مارٹ سے شاپنگ کرنا ایک عام سی بات بن گئی ہے  لیکن مارٹ میں شاپنگ کرنے کے اپنے اصول ہوتے ہیں جن میں سرفہرست شاپنگ ٹرالی کا استعمال ہے۔

مارٹ کے اندر شاپنگ ٹرالی کا رجحان اس لئے بھی زیادہ ہے کیونکہ مارٹ عموماً بڑا ہوتا ہے اور ہر چیز کا سیکشن الگ ہوتا ہے اور یہاں خریدار اپنی مرضی کے مطابق چیزوں کی خریداری کرتا ہے۔

شاپنگ ٹرالی کو ایک جگہ سے دوسری جگہ لے کر جانے کے لئے چھوٹے پہیے لگے ہوتے ہیں جبکہ اس میں سامان رکھنے کے لئے ایک بڑی باسکٹ جتنی جگہ دی جاتی ہے۔

لیکن آپ شاپنگ ٹرالی کے متعلق وہ جگہیں جانتے ہیں جو اضافی بھی ہوتی ہیں اور ان سے شاپنگ کرنا آسان ہوجاتا ہے۔

1۔ ٹرالی کے پیچھے موجود لوپ:

شاپنگ ٹرالی کے پیچھے ایک لوپ موجود ہوتا ہے ،  یہ لوپ خواتین کو اپنا ہینڈ بیگ بحفاظت ٹانگنے اور مرد حضرات کو اپنا کوٹ یا پھر جیکٹ کو ٹانگنے کے لئے دیا گیا ہے تاکہ اس میں موجود قیمتی سامان بھی محفوظ رہے اور آپ کو اپنی ان چیزوں کو ٹرالی کے اندر رکھنے کی ضرورت پیش نہ آئے۔

2۔ ٹرالی میں موجود نچلہ حصہ:

مارٹ کی شاپنگ ٹرالی میں نیچے بھی ایک حصہ ہوتا ہے جو سیدھا ہوتا ہے جب کہ اس میں 2 ہُک دیئے ہوئے ہوتے ہیں۔

یہ جگہ اس لئے ہوتی ہے تاکہ اگر اوپر والی ٹرالی کی جگہ سامان سے بھر جائے تو اس نیچے والی جگہ پر ہاتھ والی باسکٹ اٹیچ کر لی جائے اور سامان ٹرالی کے نیچے حصے میں آ سکے۔

3۔ ٹرالی میں اضافی لوپس:

شاپنگ ٹرالیوں میں اضافی لوپس بنے ہوتے ہیں جن کے استعمال سے بہت کم لوگ ہی واقف ہیں اور وہ صرف ٹرالی کے اندر سامان بھر لیتے ہیں۔

 یہ لوپس اس لئے ہوتے ہیں کہ اگر ٹرالی سامان سے بھر جائے تو تھیلیوں کو ان لوپس میں ٹانگ لیا جائے۔