مشہور سائنس دان آئنسٹائین کی تھیوری آف جنرل ریلیٹیویٹی 16 برس کے طویل اور کڑے تجربے کے بعد بھی ناقابلِ شکست قرار پائی ہے۔

1915 میں شائع ہونے والی آئنسٹائن کی تھیوری کے مطابق بڑی اور چھوٹی اشیاء زمان و مکان کے جال کو موڑ دیتے ہیں۔

بد قسمتی سے جنرل ریلیٹیویٹی کائنات کی حرکات تو بیان کرسکتی ہے لیکن اس کو استعمال کرتے ہوئے ہماری کائنات میں چھوٹے پیمانے پر ہونے والے امور کو بیان نہیں کیا جا سکتا۔

ان چیزوں کا مطالعہ کوانٹم فزکس کے تحت ہوتا ہے اور مستقبل کی تھیوری جو شاید ان دو کو یکجا کر سکے، ہمیں کائنات میں ہمارا مقام سمجھنے میں مدد دے سکتی ہے۔

یونیورسٹی آف ایسٹ اینجلیا کے طبعیات دان ڈاکٹر رابرٹ فرڈ مین کا کہنا تھا کہ جتنی کامیاب آئنسٹائن کی تھیوری آف جنرل ریلیٹیویٹی ثابت ہوئی ہے، ہم جانتے ہیں کہ یہ گریویٹیشنل تھیوری میں حتمی الفاظ نہیں ہیں۔

100 سال سے زائد عرصے کے بعد بھی دنیا بھر کے سائنس دان اس تھیوری میں سے نقائص نکالنے کے لیے کوششیں کر رہے ہیں۔

فزیکل ریویو ٹین میں شائع ہونے والی اس نئی تحقیق میں محققین نے دنیا بھر کی سات ریڈیو ٹیلی اسکوپ کے ذریعے دو بڑے پُلسر کی حرکت کا مشاہدہ کیا۔ پُلسر ایک قسم کا نیوٹرون ستارہ ہوتا ہے جو اپنے قطبین سے الیکٹرومیگنیٹک بیم نکالتا ہے۔

پُلسر کا وزن سورج سے زیادہ ہوتا ہے لیکن یہ صرف 15 میل چوڑا ہوتا ہے۔ ایک پُلسر فی سیکنڈ 44 بار گھومتا ہے جبکہ دوسرا ایک چکر لینے کے لیے 2.8 سیکنڈ لیتا ہے۔

دونوں ستارے ایک دوسرے کے گرد 147 منٹ میں 10 لاکھ کلو میٹر فی گھنٹہ کی رفتار سے چکر لگا لیتے ہیں، اور یہی وہ حرکت ہے جو انہیں مشاہدے کے لیے اہم بناتی ہے۔

ڈاکٹر فرڈ مین کے مطابق 2003 میں دریافت ہونے والے ڈبل پُلسر، آئینسٹائن یا ان کے دور کے طبعیات دانوں کے لیے ناقابلِ تصور تھے۔

محققین کو تحقیق میں ایسے اثرات دیکھنے کو ملے جو پہلے نہیں دیکھے گئے تھے۔

آسٹریلیا کے نیشنل سائنس ایجنسی کے پروفیسر ڈِک مانچسٹر کا کہنا تھا کہ گریویٹیشنل لہروں اور روشنی کے پھیلاؤ سے ہٹ کر، ہم وقت بڑھ جانے کے اثر کی پیمائش بھی کر سکے جس کی وجہ سے گھڑیاں گریویٹیشنل فیلڈز میں سست رفتار سے چلتی ہیں۔

انہوں نے کہاکہ انہیں آئینسٹائن کی مشہور اکویشن E = mc² کی ضرورت تب پڑی جب تیز گھومتے ستاروں سے نکلتی الیکٹرومیگنیٹک شعاؤں کے مدار کی حرکت پر اثرات سمجھنے لگے۔

ان شعاؤں کا تعلق 80 لاکھ ٹن فی سیکنڈ وزن کم ہونے سے ہے۔ اگرچہ یہ بہت زیادہ لگتا ہے لیکن یہ اس کے وزن کا ایک بہت چھوٹا حصہ ہے۔