یہ دل خراش خبر فرانس سے آئی ہے جہاں ایک نو سال کا بچہ گزشتہ دو برس سے ایک فلیٹ میں تنہا رہ رہا ہے کیونکہ اس کی ماں اپنے بوائے فرینڈ کے ساتھ گھر سے چلی گئی ہے۔

فرانسسی قصبے نیرساک میں ایک نوسالہ بچہ پچھلے دوسالوں سے تنہارہ رہا ہے جبکہ اس کی ماں اس علاقے سے چند کلومیٹر دور اپنے بوائے فرینڈ کے ساتھ رہی ہے۔ بچے کو دوسال تک گھر میں تنہا چھوڑنے کے جرم میں اس خاتون کو گزشتہ ہفتے 18 ماہ قید کی سزا سنائی گئی ہے۔

میڈیا رپورٹس کے مطابق، لڑکے، جس کی شناخت نہیں ہو سکی، 2020 سے 2022 تک اپارٹمنٹ میں اکیلا رہ رہا ہے جبکہ اس کی ماں اپنے ساتھی کے ساتھ پانچ کلومیٹر دور رہ رہی ہے اور صرف اپنے بیٹے سے کبھی کبھار ملنے جاتی تھی۔

اس وقت وہ چھٹی جماعت کا طالب علم ہے اور وہ اپنی ماں کو کبھی کبھار ہی دیکھتا ہے جو اسے کھانا دینے آتی ہے، میڈیا رپورٹس کے مطابق یہ نوسالہ بچہ زیادہ تر وقت قریبی بالکونی سے چوری شدہ ڈبہ بند کھانے، کیک اور ٹماٹر کھاتا تھا۔

واضح رہے کہ یہ بچہ سخت سردی کے باوجود اکثر بچلی اور گرم پانی سے محروم رہتا تھااور سردی سے بچنے کے لیے خود کو کئی کمبل میں لپیٹ لیتا تھا تاہم حیرت انگیز طور یہ بچہ باقاعدگی سے اسکول جاتا ہے اور اس کے اساتذہ نے اس کی تعریف کرتے ہوئے کہا کہ انہیں اس سے کوئی شکایت نہیں ہے کیونکہ یہ ہمیشہ مسکراتا رہتا ہے اور بہت ہی ہونہار طالب علم ہے ہمیشہ صاف ستھرے لباس میں اسکول آتا ہے اور انہیں کبھی بھی اس میں کوئی بات غیر معمولی دکھائی نہیں دی۔

تاہم اس کے ایک ہم جماعت نے کہا جب انہوں نے اس سے پوچھا یہ کیسے رہتا ہے تو اس نے جواب دیا وہ اکیلے ہی رہتا ہے اکیلے ہی کھانا کھاتا ہے اور اکیلے ہی بس سے اسکول جاتا ہے جبکہ اسکول سے گھر آنے کے بعد باہر نہیں جاتا۔

جبکہ اس بچے کے پڑو سی کبھی کبھی اسے کھانا دے کر مدد کرتے تھے، تاہم انہوں نے بالآخریہ ساری روداد میئر کو بتائی جس نے پھر پولیس کو بلایا۔

مبینہ طور پر 39 سالہ الیگزینڈرا کے نام سے شناخت کی جانے والی ماں نے قصوروار نہ ہونے کی استدعا کی اور عدالت کے سامنے حکام کی طرف سے لگائے گئے تمام الزامات سے انکار کیا۔

سماعت کے دوران، اس نے اصرار کیا کہ اس کا بیٹا سیریوئل جا رہا تھا، جہاں وہ اپنے ساتھی کے ساتھ رہتی تھی وہ اسے بس میں بٹھا دیا کرتی تھی اور خود اسکوٹر پر اس کے ساتھ ساتھ چلتی تھی، لیکن ججوں کا اس بات پریقین کرنا مشکل تھا۔

الیگزینڈرا نے یہ بھی دعویٰ کیا کہ اس کا بیٹا اس کے ساتھ رہ رہا تھا۔ تاہم، فرانسیسی پولیس نے تفتیش کے دوران پایا کہ اس نے بہت لمبے عرصے تک اس اپارٹمنٹ کا رخ نہیں کیا اور بچے کوماں کے ساتھ اسکول جاتے ہوئے بھی نہیں دیکھا گیا۔

بالآخر ایک نابالغ بچے کو چھوڑنے  کا مجرم قرار دے کر اسے 18 ماہ قید سنائی گئی جس میں سے وہ چھ ماہ الیکٹرانک بریسلٹ کے ساتھ نگرانی میں وقت گزارے گی۔ بچے کو 2022 میں سماجی خدمات کی نگرانی میں رکھا گیا تھا اور بالآخراسے  الیگزینڈرا کی تحویل سے لے کر  ایک رضاعی خاندان منتقل کر دیا گیا ہے ۔