آگرہ: بھارت میں فاسٹ فوڈ نہ کھلانے پر بیوی نے شوہر کے خلاف پولیس کو شکایت کردی۔

بھارت کے شہر آگرہ میں ایک انوکھا اور دلچسپ واقعہ رپورٹ ہوا جس میں بیوی نے شوہر کے خلاف فاسٹ فوڈ نہ کھلانے کی شکایت پولیس کو کردی ہے۔

بھارتی میڈیا کے مطابق تھانہ ہری پروت کے علاقے میں رہنے والی لڑکی کی شادی بھرت پور میں رہنے والے لڑکے سے ہوئی۔

شادی کے بعد معاملہ کچھ دنوں تک تو ٹھیک سے چلتا رہا لیکن شوہر کو دیسی کھانا پسند تھا جب کہ بیوی فاسٹ فوڈ کی دیوانی تھی اور شادی سے قبل بہت زیادہ فاسٹ فوڈ کھایا کرتی تھی۔

شادی کے بعد بیوی سادہ کھانا ہی کھاتی رہی لیکن جب بیوی نے شوہر سے فاسٹ فوڈ، چاؤمین اور پیزا کھلانے کی فرمائش کی تو شوہر نے صاف انکار کردیا۔

بعد ازاں دونوں کے درمیان جھگڑے ہونے لگے اور جھگڑے اس حد تک بڑھ گئے کہ بیوی ناراض ہوکر اپنے گھر چلی گئی جس کے بعد اس نے پولیس کا شکایت درج کروادی۔

جب یہ معاملہ پولیس کے پاس پہنچا تو پولیس بھی حیران رہ گئی اور انہوں نے اس معاملے کو فیملی کاؤنسلنگ سینٹر منتقل کردیا، جہاں فیملی کاؤنسلنگ سینٹر نے دونوں کو سمجھانے کی کوشش کی۔

آخر میں فیملی کاؤنسلنگ سینٹر نے فیصلہ دیا کہ شوہر ہفتے میں ایک دن بیوی کو فاسٹ فوڈ ضرور کھلائے گا، فیصلے سے خوش ہوکر بیوی واپس شوہر کے ہمراہ گھر روانہ ہوگئی۔