پنجاب کے صوبائی وزیر ٹرانسپورٹ جہانزیب خان کھچی نے کہا ہے کہ ٹرانسپورٹ کے شعبہ کی ترقی کے لئے عالمی تجربات سے فائدہ اٹھائیں گے۔

تفصیلات کے مطابق محکمہ ٹرانسپورٹ کی جانب سے صوبائی دارالحکومت کی عوام کو معیاری اورماحول دوست سفری سہولیات کی فراہمی کیلئے نئی بسوں کی خریداری کے حوالے سے پیشرفت پر منعقدہ جائزہ اجلاس کی صدارت صوبائی وزیر ٹرانسپورٹ جہانزیب خان کھچی نے کی۔

اجلاس میں انہوں نے کہا کہ ٹرانسپورٹ مکے شعبہ میں ترقی کے حوالے سے جرمنی، چیکو سلواکیہ اور چین ٹرانسپورٹ کے شعبہ میں سرمایہ کاری میں گہری دلچسپی رکھتے ہیں کیونکہ یہ ممالک پنجاب میں ٹرانسپورٹ کے شعبہ میں سرمایہ کاری کیلئے تیار ہیں۔

 صوبائی وزیر ٹرانسپورٹ جہانزیب کھچی اور سیکرٹری ٹرانسپورٹ اسد الرحمن گیلانی کی ذاتی کاوشوں کی بدولت ٹرانسپورٹ کے شعبہ میں سرمایہ کاری کے خواہاں ان ممالک کے وفود جلد پنجاب کا دورہ کریں گے۔

اجلاس میں لاہور ٹرانسپورٹ کمپنی کی جانب سے لاہور میں ٹریفک کے مسائل اورنئی بسوں کی خریداری کے حوالے سے مختلف سفارشات پیش کی گئیں۔ لاہور ٹرانسپورٹ کمپنی کی چیف ایگزیکٹیو آفیسر مریم خاور نے لاہور کے اربن روٹس سے متعلق حکمت عملی پر بریفنگ دی۔

اس موقع پرلاہور کی بڑھتی ہوئی آبادی اور ٹریفک کے مسائل سے متعلق مختلف تجاویز پرتفصیلی غور خوض کیا گیا۔اجلاس میں سیکرٹری ٹرانسپورٹ اسد الرحمن گیلانی، چیف ایگزیکٹو لاہور ٹرانسپورٹ کمپنی مریم خاور، پنجاب ماس ٹرانزٹ اتھارٹی، محکمہ فنانس سمیت متعلقہ محکموں کے افسران نے شرکت کی۔