کراچی میں آرمی چیف قمر جاوید باجوہ  نے تاجروں اور صنعت کاروں کے ہمراہ اجلاس میں شرکت کی ۔

پاک فوج کے شعبہ تعلقات عامہ (آئی ایس پی آر) کے مطابق گذشتہ شب آرمی چیف جنرل قمر جاوید باجوہ کے زیر اہتمام سٹیک ہولڈرز کا اختتامی اجلاس آرمی آڈیٹوریم میں منعقد ہوا جس میں آرمی چیف نے صنعتکاروں اور تاجروں سے بات چیت  کی ۔

 آرمی چیف جنرل قمر باجوہ نے کہا کہ قومی سلامتی کا  معیشت سے گہرا تعلق ہے جبکہ ملک میں خوشحالی قومی سلامتی اور معاشی نمو کے درمیان توازن سے آتی ہے۔ آرمی چیف نے کہا کہ مختلف مباحثوں اور سیمیناروں کا مقصد سٹیک ہولڈرز کو ایک پلیٹ فارم پر لانا ہے تاکہ مشترکہ طور پر آگے بڑھنے کے لیے سفارشات مرتب کی جاسکیں۔

صنعتکاروں و تاجروں سے اجلاس میں آرمی چیف کی جانب سے مشترکہ سوال کیا گیا کہ معیشت کیوں نہیں چل رہی اور ملک میں نئی سرمایہ کاری کیوں نہیں ہورہی؟، جس پر تاجر برادری نے جواب میں کہا کہ حکومت کی ٹیکس پالیسی، بلند شرح سود معیشت میں بڑی رکاوٹیں ہیں۔

تاجر برادری کا اجلاس میں کہنا تھا کہ ایکسپورٹ سیکٹر کے ٹیکس ریفنڈ کے مسائل ہیں جبکہ ریفنڈ میں حکومت نے نقد کی جگہ بانڈز دیئے ہیں اور بانڈز کو ان کیش کرنے کا طریقہ کار وضع نہیں ہے۔

“National security is intimately linked to eco while prosperity is function of balance in security needs & economic growth. Aim of various discussions and seminars was to bring stake holders at one platform to formulate recommendations for a synergistic way forward”, COAS. (2of2) pic.twitter.com/IvV70ZZKo9

— DG ISPR (@OfficialDGISPR) October 3, 2019

انہوں نے مزید کہا کہ موجودہ سال میں بنائی گئی ریفنڈ پالیسی میں برآمدکنندہ گان کو مشکلات ہیں، ریفنڈ کی دستاویز کو سہل اور آسان بنانے کی ضرورت ہے۔

شکایتی لہجے میں تاجر برادری نے آرمی چیف سے کہا کہ نیب کاروباری برادری کو پریشان کررہی ہے اور نیب کی وجہ سے کوئی بھی حکومت کے ساتھ کام کرنے کو تیار نہیں، بڑے صنعت کاروں اور تاجروں کو نیب طلب کررہی ہے۔