مہنگائی سے ستائے شہریوں  کے لیے پاکستان پولٹری ایسوی ایشن  کی جانب سے اچھی خبر سامنے آگئی۔

تفصیلات کے مطابق پاکستان پولٹری ایسوی ایشن نے اعلان کیا ہے کہ  سردیوں میں انڈے اور مرغی کی قیمتوں میں مزید اضافہ نہیں ہوگا ۔

ترجمان پاکستان پولٹری ایسوی ایشن کا کہنا ہے کہ  کورونا  وباء اوربارشوں کی وجہ سے پچاس لاکھ چوز ےختم ہونے سے مرغی کی قیمتوں میں اضافہ ہوا ہے۔

ترجمان نے مزید کہا کہ کورونا کے بعد شادی ہالز ،ریسٹورنٹس اور اسکول کھلنے کے باعث طلب میں اضافہ ہوا ہے۔ڈیمانڈ اینڈ سپلائی میں فرق کی وجہ سے انڈے اور مرغی مہنگی ہوئی ہے۔

انہوں نے کہا کہ  فارمرز کم ہونے کی وجہ سے اور طلب بڑھنے کی وجہ سے نرخوں میں اضافہ ہوا۔گذشتہ دو سال سے فارمر زکو شدید نقصان ہوا  جس کے باعث 60 فیصد مرغی کے فارم بند ہوگئے ہیں۔

ترجمان پاکستان پولٹری ایسوی ایشن کا کہنا ہے کہ  آئندہ ماہ مرغی اور انڈے کی پیداوار میں اضافے سے قیمتوں میں کمی آسکتی ہے یا پھر قیمتیں مستحکم رہ سکتی ہیں تاہم اس میں اضافے کا کوئی امکان نہیں ہے۔

ترجمان  پاکستان پولٹری ایسوی ایشن  نے بتایا کہ  پاکستان میں سالانہ ایک سو ستاون ارب  انڈے کی پیداوار اور استعمال ہوتا ہے جبکہ  یومیہ 80 لاکھ مرغی کا استعمال ہوتا ہے۔

ان کا کہنا تھا کہ پیداواری لاگت اورفیڈ مہنگی ہونے کی وجہ سے بھی مرغی اور انڈے مہنگے ہوئے ہیں۔ پچاس کلو والی فیڈ کی بوری 2600 سے بڑھ کر 4000 روپے کی ہوگئی ہے۔  فیڈ اور دیگر ٹیکسز میں کمی کی جائے تومرغی اور انڈے کی قیمت میں کمی کا فائدہ صارف کو ہوسکتا ہے۔