یورپی ایوی ایشن سیفٹی ایجنسی نے اکاؤ آڈٹ کے باوجود پی آئی اے کی یورپ کے لئے پروازوں پر پابندیاں ختم نہ کرنے کا فیصلہ کیا ہے۔

پی آئی اے نے یورپی ممالک کے لیے عائد پابندیوں کے خاتمے کے لیے یورپی یونین ایوی ایشن سیفٹی ایجنسی کو خط لکھا تھا جس جواب قومی ایئر لائن کو مل گیا ہے۔

اپنے جوابی خط میں یورپی ایوی ایشن سیفٹی ایجنسی نے اکاؤ آڈٹ کے باوجود پی آئی اے کی یورپ کے لئے پروازوں پر پابندیاں ختم نہ کرنے سے آگاہ کیا ہے۔

مزید پڑھیے: یورپی یونین کی پی آئی اے پر پابندی ختم ہونے کا امکان

خط میں یورپی یونین ایوی ایشن سیفٹی ایجنسی کا کہنا تھا کہ عالمی ہوابازی کی تنظیم اکاؤ کے آڈٹ کا یورپی روٹ پر پابندی سےکوئی تعلق نہیں، ایاسا اکاؤ آڈٹ کے بعد بھی سول ایوی ایشن کی کارکردگی کاجائزہ لےگی۔

جوابی خط میں کہا گیا ہے کہ پی آئی اے سے پابندی ہٹانے کے لئے ایاسا سول ایوی ایشن کا آڈٹ کرائے گی، جس کے بعد ہی یورپی روٹ کی پابندیاں ختم کرنےکا حتمی فیصلہ کیا جائے۔

یورپی یونین ایوی ایشن سیفٹی ایجنسی کا کہنا ہے کہ پیشہ ورانہ لائسنس سے متعلق ایاساحکام کی تحقیقات جاری ہیں لیکن کورونا کے باعث ایاسا عملےکی سفری سرگرمیاں محدود ہیں، کورونا صورت حال بہتر ہوتے ہی آڈٹ کرایا جائے گا۔

واضح رہے کہ یورپی یونین ائیر سیفٹی ایجنسی نے 2020 سے پاکستان انٹرنیشل ایئر لائنز (پی آئی اے) کے یورپین ممالک کے لیے فضائی آپریشن کے اجازت نامے کو معطل کر رکھا ہے۔