خیبر پختونخوا حکومت نے پشاور میں ہفتے کے 3 دن سی این جی اسٹیشنز کھولنے کا فیصلہ کیا ہے۔

بول نیوز کے مطابق خیبر پختونخوا حکومت نے پشاور ہائی کورٹ کے فیصلے کو مد نظر رکھتے ہوئے صوبائی دارالحکومت میں ہفتے کے 3 دن سی این جی اسٹیشنز کھولنے کا فیصلہ کیا ہے۔

عدالتی حکم کے تحت پشاور بھر میں سی این جی اسٹیشنز پیر ، بدھ اور جمعہ کے روز صبح 09 سے شام 4 بجے تک کھلے رہیں گے۔

ضلعی انتظامیہ کا کہنا ہے کہ وقت کی پابندی نہ کرنے والے سی این جی اسٹیشنز کی انتظامیہ کے خلاف تادیبی کارروائی کی جائے گی۔

یہ بھی پڑھیں: گیس کی سپلائی اتنی ہے جتنی زمین سے نکل رہی ہے، حماداظہر

واضح رہے کہ حکومت نے ملک میں گیس کی کمی کے پیش نظر ملک بھر میں سی این جی اسٹیشن بند کررکھے ہیں۔

گیس بحران کے باعث ڈپٹی کمشنر پشاور نے دفعہ 144 نافذ کرکے سی این جی اسٹیشنز 20 جنوری تک بند رکھنے کا نوٹی فکیشن جاری کیا تھا۔

ڈپٹی کمشنر کے فیصلے کے خلاف عدالت عالیہ میں درخواست دائر کی گئی تھی۔

یہ بھی پڑھیں: گیس کے قدرتی ذخائر میں کمی کا حکومتی بیان مسترد

عدالت نے فریقین کا موقف سننے کے بعد 14 جنوری کو فیصلہ سنایا تھا۔

پشاور ہائی کورٹ نے اپنے مختصر فیصلے میں سی این جی اسٹیشنز ہفتے میں تین دن کھولنے کا حکم دیا تھا۔