موٹر سائیکلوں کے شوقین افراد کیلئے بری خبر سامنے آئی ہے، کمپنی نے قیمت میں اچانک بڑی تبدیلی کردی۔

سوزوکی کمپنی نے اپنی تمام موٹر سائیکلوں کے ماڈلز کی قیمتوں میں اضافہ کردیا جس کا اطلاق یکم نومبر سے ہوگیا ہے۔

کمپنی کی جانب سے جاری کی گئی نئی پرائس لسٹ کے مطابق مختلف ماڈل کی قیمتوں میں 15 تا 20 ہزار روپے کا اضافہ کیا گیا ہے۔

سوزوکی کمپنی نے سوزوکی جی ایس 150 یورو کی قیمت 15 ہزار روپے کے اضافے سے 2 لاکھ 66 ہزار روپے کردی ہے جبکہ اس ماڈل کی قیمت پہلے 2 لاکھ 51 ہزار روپے تھی ، اس کے علاوہ جی آر 150 کی قیمت میں 20 ہزار روپے کا اضافہ کردیا ہے جس سے اس ماڈل کی قیمت 3 لاکھ 85 ہزار روپے تک پہنچ گئی ہے جبکہ جی آر 150 کی قیمت پہلے 3 لاکھ 65 ہزار روپے تھی۔

اسی طرح سوزوکی ویرینٹ جی ڈی 110 ایس کی قیمت بھی 15ہزار روپے اضافے سے 2 لاکھ 44 ہزار روپے کردی ہے جو پہلے 2 لاکھ 29 ہزار روپے تھی، جبکہ حال ہی میں متعارف کردہ جی ایس ایکس 125 کی قیمت بھی 3 لاکھ 59 ہزار روپے مقرر کر دی ہے۔

اس سے قبل ہنڈا بھی اپنی تمام موٹر سائیکلوں کی قیمتوں میں اضافے کا اعلان کرچکی ہے جبکہ آٹو انڈسٹری ذرائع کے مطابق یاماہا کی جانب سے بھی قیمتیں بڑھانے کا فیصلہ متوقع ہے۔

ذرائع کا کہنا ہے کہ کمپنی نے 125 متعارف کرنے کے بعد جی ایس 150 ایس ای کی فروخت بند کردی ہے۔

اس حوالے سے ڈیلرز کا کہنا ہے کہ موٹر سائیکلوں کی قیمتوں میں مسلسل اضافے کے باعث موٹر سائیکلوں کی فروخت میں نمایاں کمی دیکھی جارہی ہے جبکہ آٹو اسمبلرز کا کہنا ہے کہ درآمدات مہنگی ہونے کے باعث موٹر سائیکلیں مہنگی ہورہی ہیں۔