اسلام آباد: فرٹیلائزر پلانٹس کیلئے سستی گیس خریداری معاہدے کا جون میں اختتام ہونے جارہا ہے، تاہم نئے معاہدے عالمی مالیاتی فنڈ (آئی ایم ایف) شرائط کے مطابق ہوں گے۔

ذرائع وزارت خزانہ کے مطابق وزارت خزانہ کی ہدایت پر توانائی ڈویژن کی فرٹیلائزر پلانٹس کے ساتھ گیس خریداری کے نئے معاہدے کرنے کی تیاری کی جارہی ہے، تاہم 9 فرٹیلائزر پلانٹس کے ساتھ سستی گیس خریداری کے معاہدے جون 2024 تک ختم ہو جائیں گے۔

نئے معاہدوں کے مطابق فرٹیلائزر پلانٹس کو فی ایم ایم بی ٹی یو 760 روپے سے 1750 روپے تک فروخت کی جائے گی جبکہ 5 فرٹیلائزر پلانٹس کو کھاد کی پیداوار کیلئے گیس 580 روپے فی ایم ایم بی ٹی یو سے بڑھ کر 760 روپے میں ملے گی۔

ذرائع کا کہنا ہے کہ فرٹیلائزر پلانٹس کو مشینری چلانے کیلئے گیس 1580 روپے فی ایم ایم بی ٹی یو سے بڑھ کر 1750 روپے میں ملے گی، فاطمہ فرٹیلائزر اور ایگری ٹیک کو کھاد کی پیداوار کیلئے 1597 روپے فی ایم ایم بی ٹی یو گیس فروخت کی جائے گی۔

وزارت خزانہ کے ذرائع نے مزید بتایا کہ فرٹیلائزر پلانٹس کیلئے فی ایم ایم بی ٹی یو گیس نرخوں کیلئے نئے معاہدے کا اطلاق آئندہ مالی سال سے ہونے کا امکان ہے۔