مرغی کے گوشت کی بڑھتی قیمتوں پر حکومت نے بڑا اعلان کردیا ہے۔

پنجاب کے وزیر برائے لائیو اسٹاک اور زراعت سید عاشق حسین کرمانی نے اعلان کیا ہے کہ صوبائی حکومت تمام اسٹیک ہولڈرز کے ساتھ مل کر مرغی کے گوشت کی فکس قیمتیں مقرر کرنے کا ارادہ رکھتی ہے۔

انہوں نے لاہور میں پاکستان پولٹری ایسوسی ایشن کے چیئرمین محمد نصرت کی قیادت میں ایک وفد سے ملاقات کی۔

اس گروپ میں پنجاب پولٹری ایسوسی ایشن، پولٹری ٹریڈرز ایسوسی ایشن اور برائلر فارمرز ایسوسی ایشن کے نمائندے شامل تھے، اجلاس میں چکن سپلائی چین اور قیمتوں کا جائزہ لینے پر توجہ مرکوز کی گئی۔

ملاقات کے دوران برائلر چکن کی قیمتوں کے تعین کے لیے مختلف آپشنز پر تبادلہ خیال کیا گیا۔

سیکرٹری لائیو سٹاک پنجاب نے روشنی ڈالی کہ حال ہی میں چکن کی قیمتوں میں 70 روپے فی کلو اضافہ ہوا ہے جس کی وجہ طلب اور رسد کے مسائل نہیں ہیں۔

مزید برآں، پاکستان پولٹری ایسوسی ایشن کے چیئرمین محمد نصرت نے صوبائی وزیر لائیو سٹاک سے کاروبار سے متعلق مسائل اور تحفظات کا اظہار کیا۔

صوبائی وزیر نے پولٹری ایسوسی ایشن کے تحفظات دور کرنے کا وعدہ کیا اور کہا کہ پنجاب حکومت تمام اسٹیک ہولڈرز کی رائے لے کر چکن کی قیمتیں مقرر کرے گی۔

ان کا کہنا تھا کہ حکومت پیداواری لاگت پر 15 سے 20 فیصد منافع کے مارجن کی اجازت دے گی اور موجودہ بلند قیمتوں کو کم کرنے کے لیے کام کرے گی۔

لائیو اسٹاک سیکرٹری قیمتوں کے تعین کا منصوبہ بنائیں گے جسے منظوری کے لیے وزیر اعلیٰ کو بھیجا جائے گا۔

پولٹری ایسوسی ایشن نے قیمتیں کم کرنے میں مدد کے لیے حکومت کے ساتھ تعاون کرنے پر اتفاق کیا۔