وفاقی وزیر سرمایہ کاری بورڈ عبدالعلیم خان کا کہنا ہے کہ معیشت کے استحکام کیلئے حکومت خسارے والے تمام سرکاری اداروں کی نجکاری کر رہی ہے۔

 نیدر لینڈ کی سفیر ہینی فوکیل ڈی ورائزر نے وفاقی وزیر سرمایہ کاری بورڈ عبدالعلیم خان سے ملاقات کی جس میں پاکستان اور نیدرلینڈ کے مابین دو طرفہ دوستانہ اور باہمی تعلقات کے فروغ اور دیگر اہم امور پر بات چیت کی گئی۔

وفاقی وزیر نے پی آئی اے، ڈسکوز، فرسٹ ویمن بینک، اسٹیٹ لائف انشورنس اور دیگر اداروں کی نجکاری سے متعلق گفتگو کی۔

وفاقی وزیر سرمایہ کاری بورڈ عبدالعلیم خان نے کہا کہ معیشت کے استحکام کیلئے حکومت خسارے والے تمام سرکاری اداروں کی نجکاری کر رہی ہے۔

انہوں نے کہا کہ بزنس کمیونٹی نیدرلینڈ کی ڈیری پراڈکٹس کے معیار اور مہارت سے فائدہ اٹھا سکتی ہے، پاکستان یورپی ممالک کو سرمایہ کاری کے لیے خصوصی اہمیت دیتا ہے۔

دوران ملاقات نیدرلینڈ کی سفیر ہینی فوکیل نے کہا کہ پاکستان سے اہم شعبوں میں تعلقات میں اضافے کے خواہاں ہیں، تعلیم، صحت، ڈیری مصنوعات میں ایک دوسرے کے تجربات سے فائدہ اٹھا سکتے ہیں۔

انہوں نے کہا کہ پاکستان سے مختلف شعبوں میں انویسٹمنٹ اور باہمی تعاون کو بڑھائیں گے، پاکستان زراعت کے شعبے میں جدت لا کر مزید ترقی کر سکتا ہے۔

نیدرلینڈ کی سفیر ہینی فوکیل نے کہا کہ پاکستان میں قیام خوشگوار، یہاں کے لوگ شاندار اورمہمان نواز ہیں۔

وفاقی وزیر عبدالعلیم خان نے کہا کہ درست اقدامات کر کے ہمیں اپنی بڑھتی ہوئی آبادی کو وسائل کے مطابق ڈھالنا ہو گا۔