وفاقی وزیر خزانہ محمد اورنگزیب نے عوام کو خبردار کردیا ہے۔

ذرائع کے مطابق وفاقی وزیر خزانہ محمد اورنگزیب نے تقریب سے خطاب کرتے ہوئے کہا کہ پاکستان میں آبادی بہت زیادہ بڑھ چکی ہے۔ پاکستان کو موسمیاتی تبدیلی کے اثرات سے بچنے کے ساتھ آبادی کو کنٹرول کرنا ہو گا۔

انہوں نے کہا کہ پاکستان کو عالمی مالیاتی ادارے اور ورلڈ بینک سے موسمیاتی تبدیلی کی فنانسنگ کیلئے مؤثر منصوبے بنانے ہوں گے۔ رواں ماہ کے اختتام تک آئی ایم ایف ایگزیکٹو بورڈ سے اسٹاف لیول معاہدے کی منظوری ہو جائے گی۔

محمد اورنگزیب نے کہا کہ معاہدے کی منظوری کے بعد کلائمیٹ فنانسنگ پر بھی بات کی جائے گی۔ اکتوبر میں سالانہ میٹنگ کے دوران آئی ایم ایف اور ورلڈ بینک سے کلائمیٹ فنانسنگ پر بات ہو گی۔

وفاقی وزیر خزانہ نے کہا کہ آئی ایم ایف اور عالمی بینک کے ساتھ مل کر موسمیاتی تبدیلی کے منصوبوں کی مانیٹرنگ کو بہتر بنایا جائے گا۔ موسمیاتی تبدیلی کے اثرات سے بچنے کے لیے موسمیاتی تبدیلیوں پر مبنی پالیسیاں بنانا ہوں گی۔

محمد اورنگزیب نے کہا کہ ملکی معیشت کو بہتر بنانے کے لیے نجی شعبے کو اپنا کردار ادا کرنا ہوگا۔ معاشی صورتحال بہتر بنانے کے لیے بجٹ، ٹیکس اقدامات، انرجی سیکٹر اور معیار زندگی بہتر بنانی ہوگی۔