کراچی : مہنگی بجلی کی شکار شہر قائد کی عوام پر مونسپل ٹیکس عائد کردیا گیا۔

کے الیکٹرک کی جانب سے جولائی کے بلوں میں مونسپل ٹیکس کی رقم شامل کردی گئی ہے، شہری پہلے ہی اوور بلنگ اور مہنگی بجلی سے پریشان ہیں۔

101 یونٹ سے 200 یونٹ تک 20 روپے، 201 سے 300 یونٹ تک 40 روپے، 301 سے 400 یونٹ تک 100 روپے، 401 سے 500 یونٹ تک 125 روپے مونسپل ٹیکس ہے۔

علاوہ ازیں 501 سے 600 یونٹ تک 150روپے،601 سے 700 یونٹ تک 175 روپے اور 700 سے زائد یونٹ استعمال کرنے والے صارفین پر 300 روپے یوٹیلیٹی کی مد میں واجب الادا ہوں گے۔

کمرشل بجلی استعمال کرنے والے صارفین کی تمام کیٹیگریز پر 400 روپے لاگو کیے گئے ہیں،  صنعتی صارفین کی تمام کیٹیگریز پر بھی 400 روپے لاگو کیے گئے ہیں۔

میئر کراچی کا دعویٰ ہے کہ ٹیکس کی وصولی سے شہر میں ترقیاتی کاموں میں بہتری آئے گی، کے ایم سی کو کراچی شہر سے صرف چند کروڑ روپے ٹیکس وصول ہوتا ہے۔

میئر کراچی نے کہا چاہتے ہیں کہ میونسپل ٹیکس کے معاملے پر اسٹے آرڈرختم ہو، کے الیکٹرک کے ذریعے ٹیکس وصولی شہر کے مفاد میں ہے۔

میئر کراچی کا کہنا ہے کہ کے ایم سی چارجز وصول کرنے پر کے الیکٹرک کو 7.5 فیصد ملے گا، معاہدے کے تحت وصول کی گئی رقم میں سے 50 فی صد کے الیکٹرک کے واجبات کی مد میں ادا ہوں گے۔

کے ایم سی کے ذمے کے الیکٹرک کے ڈیڑھ ارب واجبات ہیں، اس معاہدے کا اطلاق کنٹونمنٹ ایریاز پر نہیں ہوگا، کے الیکٹرک ایک ماہ کی پیشگی اطلاع پر بغیر کسی وجہ معاہدہ ختم کرسکتا ہے۔