انرجی ایکسپرٹ خالد ولید کا کہنا ہے کہ بجلی سہولت پیکیج کا مقصد سردیوں میں بجلی کی طلب بڑھانا ہے۔

انرجی ایکسپرٹ خالد ولید سے بول نیوز سے خصوصی گفتگو کرتے ہوئے سوال کیا گیا کہ حکومت نے عوام کو ریلیف دیا، ایسے حالات میں جب معاشی حالات اچھے نہیں ہیں، سردیوں میں 26 روپے فی یونٹ تک کے ریلیف کو آپ کس طرح دیکھتے ہیں؟

سوال کے جواب میں انرجی ایکسپرٹ خالد ولید نے کہا کہ یہ حکومت کی جانب سے ایک بہت اچھا اقدام ہے، پہلے اس چیز کو سمجھ لیں کہ پاکستان میں ہو کیا رہا ہے، آپ کی بجلی کی پلینگ کے مطابق آپ کے پاس جو کپیسٹی اسٹارٹ ہے وہ تقریباً 40 ہزار سے زیادہ میگاواٹ ہے اور موسم گرما میں آپ کا جو پیک آتا ہے وہ تقریباً 25 ہزار سے 30 ہزار ہے، سردیوں میں طلب کم ہو کر 12 سے 18 ہزار کے درمیان چلی جاتی ہے، چونکہ سردیوں میں طلب کم ہو جاتی ہے تو حکومت یہ چاہ رہی ہے کہ کسی طریقے سے سردیوں میں بجلی کی طلب کو بڑھا سکے۔

انہوں نے کہا کہ یہاں ایک بات میں واضح کرنا چاہوں گا کہ یہ ریلیف 23 روپے کا نہیں ہے بلکہ یہ ریلیف 23 روپے فلیٹ ریٹ کا ہے، اس کا مطلب ہے کہ اگر آپ پہلے سے زیادہ بجلی کا استعمال کرتے ہیں، مثال کے طور پر اگر آپ 700 یونٹ سے زیادہ بجلی استعمال کرتے ہیں تو آپ کو 43 روپے کا یونٹ ملنا تھا لیکن اب وہ فلیٹ ریٹ پر 23 روپے کا ملے گا، اس کا مقصد یہ ہے کہ حکومت سردیوں میں بجلی کی ڈیمانڈ کو بڑھا سکے، لیکن ساتھ میں حکومت کو صارفین کو تھوڑی سی آگاہی دینے کی ضرورت ہے، کیونکہ اس کا فائدہ صارفین کو تو ہو گا ہی لیکن ملک کو تب ہو گا جب لوگ زیادہ بجلی استعمال کریں گے اور ایسے آلات کو بھی بجلی پر لے کر آئیں گے جو گیس کے ذریعے استعمال کرتے ہیں، مثال کے طور پر لوگ اپنے کچن میں استعمال ہونے والے آلات یا مشینری کو گیس کے بجائے بجلی پر چلائیں۔

خالد ولید نے کہا کہ گیس کے ہیٹرز اور گیزر کو بھی الیکٹرک کرنا ہو گا تاکہ بجلی کی مانگ بڑھ سکے، اور ہم سردیوں میں گیس کے ڈیفیسٹ سے بچ سکیں۔

دوسری جانب انرجی ایکسپرٹ محمد عارف سے بول نیوز سے خصوصی گفتگو کرتے ہوئے سوال کیا گیا کہ بجلی سہولت پیکیج سے صارفین کو تو فائدہ ہو گا ہی لیکن کیا اس اقدام سے سردیوں میں ہونے والی گیس قلت کو بھی پورا کیا جاسکے گا؟ اور ملک کو کتنا فائدہ ہو گا؟

سوال کے جواب میں انرجی ایکسپرٹ محمد عارف نے کہا کہ یہ ایک بہت اچھا اقدام ہے میں کافی عرصے سے چاہتا تھا کہ ایسا ہو اور آخر کار حکومت نے یہ کر دیا، میں سمجھتا ہوں کہ صارفین کے لیے تو یہ اچھا ہے ہی اور حکومت کیلئے بھی اچھا ہے۔