اسلام آباد: ملک بھر میں آئندہ 15 روز کے لیے پیٹرول اور ڈیزل کی قیمتوں میں اضافہ کردیا گیا جبکہ مٹی کے تیل اور لائٹ ڈیزل آئل کی قیمت میں کمی کر دی گئی۔

وزارت خزانہ کی جانب سے پیٹرولیم مصنوعات کی قیمتوں میں ردوبدل کا نوٹیفکیشن جاری کر دیا گیا جس کے مطابق پیٹرول کی فی لیٹر قیمت میں 3 روپے 72 پیسے کا اضافہ کیا گیا جس کے بعد پیٹرول کی نئی قیمت 252 روپے 10 پیسے مقرر کردی گئی۔

نوٹیفکیشن میں بتایا گیا ہے کہ ہائی اسپیڈ ڈیزل کی قیمت 3 روپے 29 پیسے فی لٹر اضافے کے بعد 258 روپے 43 پیسے فی لٹر ہو گئی۔

نوٹیفکیشن میں مزید کہا گیا کہ مٹی کا تیل 62 پیسے اور لائٹ ڈیزل 48 پیسے سستا کردیا گیا، قیمتوں میں کمی کے بعد مٹی کے تیل کی نئی قیمت 164 روپے 98 پیسے فی لٹر اور لائٹ ڈیزل آئل کی نئی قیمت 151 روپے 73 پیسے فی لٹر ہوگئی۔

وزارت خزانہ کے نوٹیفکیشن کے مطابق پیٹرولیم مصنوعات کی نئی قیمتوں کا اطلاق یکم سے 15 دسمبر 2024 تک ہوگا۔