اسلام آباد: شہری پیٹرولیم مصنوعات پر بھاری ٹیکسز، ڈیوٹیز اور مارجن کے بوجھ تلے دب گئے ہیں۔

شہریوں پر پیٹرولیم مصنوعات کی قیمتوں کا بوجھ مزید بڑھ گیا ہے، ایک لیٹر پیٹرول پر 107 روپے 12 پیسے جب کہ ہائی اسپیڈ ڈیزل پر 104 روپے 59 پیسے ٹیکس، ڈیوٹیز اور مارجنز وصول کیے جا رہے ہیں۔

ذرائع کے مطابق پیٹرول اور ہائی اسپیڈ ڈیزل پر 70 روپے فی لیٹر پیٹرولیم لیوی عائد ہے جو ملکی تاریخ میں سب سے زیادہ ہے۔

پیٹرول کے فی لیٹر میں 15 روپے 28 پیسے کسٹمز ڈیوٹی، 8 روپے 64 پیسے ڈیلرز کمیشن اور 7 روپے 87 پیسے آئل مارکیٹنگ کمپنیوں کا مارجن شامل ہے۔

اسی طرح ہائی اسپیڈ ڈیزل میں 15 روپے 78 پیسے کسٹمز ڈیوٹی، 8 روپے 64 پیسے ڈیلرز کمیشن اور 7 روپے 87 پیسے آئل مارکیٹنگ کمپنیوں کا مارجن وصول کیا جا رہا ہے۔

ذرائع کا کہنا ہے کہ پیٹرول کی ایکس ریفائنری قیمت 148 روپے 51 پیسے جب کہ شہریوں کے لیے قیمت 255 روپے 63 پیسے مقرر ہے۔

ہائی اسپیڈ ڈیزل کی ایکس ریفائنری قیمت 154 روپے 06 پیسے اور صارفین کے لیے 258 روپے 64 پیسے فی لیٹر مقرر کی گئی ہے۔

اس وقت پیٹرول اور ڈیزل پر کوئی سیلز ٹیکس وصول نہیں کیا جا رہا تاہم ٹیکسز اور مارجنز کی وجہ سے عوام پر اضافی بوجھ بڑھ گیا ہے۔