کراچی: امریکا کی جانب سے متوقع ٹرمپ ٹیرف کے تناظر میں آل پاکستان ٹیکسٹائل ملز ایسوسی ایشن (اپٹما) نے امریکی کاٹن کی درآمدات بڑھانے کے حوالے سے اقدامات کا آغاز کردیا ہے۔

آل پاکستان ٹیکسٹائل ملز ایسوسی ایشن نے اس سلسلے میں سیکرٹری تجارت کو باضابطہ خط ارسال کیا ہے۔

خط میں کہا گیا ہے کہ امریکن کاٹن کی درآمد 2025 میں 30 فیصد سے زائد بڑھائی جا سکتی ہے جب کہ 2024 میں اس کی درآمدات 77 کروڑ ڈالر تک رہنے کا امکان ہے جو 2025 میں ایک ارب ڈالر تک جاسکتی ہیں۔

اپٹما کے خط میں سفارش کی گئی ہے کہ وزارت تجارت امریکن کاٹن کی درآمد کے لیے مراعات اور سہولیات کی فراہمی کے اقدامات کرے تاکہ مقامی ٹیکسٹائل انڈسٹری کو تقویت دی جاسکے۔

خط میں مزید تجویز دی گئی ہے کہ امریکی ویلیو ایڈیڈ مصنوعات پر 20 فیصد مراعات سے فائدہ اٹھانے کے لیے امریکا سے مذاکرات کیے جائیں جبکہ فیومی گیشن (جراثیم کشی) کی شرط ختم کرنے کی بھی سفارش کی گئی ہے تاکہ درآمدی عمل میں آسانی ہو۔

اپٹما نے فری کمرشل زون کے قیام کی تجویز بھی دی ہے جس کا مقصد امریکن کاٹن کی درآمد کو مزید سہل اور مؤثر بنانا ہے۔

خط کے مطابق یہ تجاویز اپٹما کے حالیہ اجلاس کی روشنی میں مرتب کی گئی ہیں جس میں ٹرمپ ٹیرف کے ممکنہ اثرات اور ان سے نمٹنے کے لیے حکمت عملی پر غور کیا گیا۔