وفاقی حکومت نے آئی ایم ایف کی ایک اور اہم شرط پوری کرتے ہوئے ایف بی آر کے ذریعے گریڈ 17 اور اس سے اوپر کے افسران کے اثاثے ظاہر کرنے کا نوٹیفکیشن جاری کر دیا ہے۔

اس اقدام کا مقصد اثاثہ جات شفافیت اور جواب دہی کے نظام کو مضبوط بنانا ہے۔

نوٹیفکیشن کے مطابق انکم ٹیکس آرڈیننس 2001 کے تحت قواعد میں اہم ترامیم متعارف کرائی گئی ہیں، جن میں لفظ سول سرونٹ کو تبدیل کرکے پبلک سرونٹ شامل کر دیا گیا ہے۔

مزید برآں، قواعد میں پبلک سرونٹ کی نئی جامع تعریف بھی شامل کر لی گئی ہے۔

نئی تعریف کے مطابق شامل کی گئی کیٹیگریز میں گریڈ 17 اور اوپر کے وفاقی ملازمین، صوبائی اور خود مختار اداروں کے افسران اور حکومتی ملکیتی کمپنیوں اور کارپوریشنز کے افسران شامل ہیں۔

تمام ملازمین جن پر قومی احتساب آرڈیننس کا اطلاق ہوتا ہے، تاہم مستثنیٰ افراد اس فہرست کا حصہ نہیں ہوں گے

ایف بی آر کے مطابق ان ترامیم کا بنیادی مقصد اثاثہ جات شیئرنگ کے نظام کو زیادہ شفاف اور ہم آہنگ بنانا ہے تاکہ احتساب کے عمل میں بہتری لائی جا سکے۔

ادارے کا کہنا ہے کہ قواعد کو مزید جامع، واضح اور بین الاقوامی تقاضوں سے ہم آہنگ بنانے کے لیے تبدیلیاں کی گئی ہیں، جو مستقبل میں کرپشن فری نظام کے لیے سنگ میل ثابت ہوں گی۔

حکومتی ذرائع کے مطابق یہ اقدام آئی ایم ایف پروگرام کے تحت اصلاحات کا اہم حصہ ہے جس سے شفافیت اور گورننس ریفارمز کے عمل کو تقویت ملے گی۔