اسلام آباد: سنی اتحاد کونسل کی مخصوص نشستوں کے کیس میں مسلم لیگ (ن) نے تحریری معروضات سپریم کورٹ آف پاکستان میں جمع کرادیں۔

مسلم لیگ (ن) کے ایڈووکیٹ حارث عظمت کے ذریعے تحریری معروضات جمع کرائی گئیں جس میں آرٹیکل 63 اے کا حوالہ دیا گیا۔

مسلم لیگ (ن) نے جواب میں کہا کہ نشستیں خالی نہیں چھوڑی جا سکتیں، سنی اتحاد کونسل نے انتخابات میں حصہ نہیں لیا، انہوں نے کوئی سیٹ نہیں جیتی، سنی اتحاد کونسل نے مخصوص نشستوں سے متعلق کوئی لسٹ الیکشن کمیشن میں جمع نہیں کرائی۔

تحریری معروضات میں کہا گیا کہ ن لیگ اور دیگر سیاسی جماعتوں نے مخصوص نشستیں لینے کیلئے الیکشن کمیشن کو خط لکھا، ن لیگ اور دیگر سیاسی جماعتوں نے الیکشن کمیشن کو کہا کہ مخصوص نشستیں انہیں ملنی چاہئیں نہ کہ سنی اتحاد کونسل کو۔

جمع کرائی گئی معروضات میں مسلم لیگ (ن) نے مزید کہا کہ الیکشن کمیشن نے معاملے کو دیکھا اور مخصوص نشستیں ن لیگ اور دیگر سیاسی جماعتوں کو الاٹ کیں۔

واضح رہے کہ سپریم کورٹ میں سنی اتحاد کونسل کی مخصوص نشستوں سے متعلق کیس کی سماعت آج ہوگی۔

چیف جسٹس پاکستان قاضی فائز عیسیٰ کی سربراہی میں فل کورٹ مخصوص نشستوں سے متعلق کیس کی سماعت کرے گا۔

سنی اتحاد کونسل کے وکیل جواب الجواب دلائل دیں گے جبکہ الیکشن کمیشن کے وکیل سمیت تمام وکلاء اپنے دلائل دے چکے ہیں۔